Փող չկա․ ԱՀԿ-ն կտրուկ կրճատելու է աշխատակիցների թիվը

Առողջապահության համաշխարհային կազմակերպությունը (ԱՀԿ) ֆինանսավորման պակասի պատճառով բաժանմունքների թիվը 76-ից կկրճատի մինչև 34, հայտարարել է կազմակերպության ղեկավար Թեդրոս Ադհանոմ Գեբրեյեսուսը։

Նա նախկինում զգուշացրել էր ապագայում կրճատումների մասին՝ ԱՄՆ նախագահ Դոնալդ Թրամփի կողմից ԱՀԿ ծրագրերի ֆինանսավորումը կասեցնելուց հետո միջոցների պակասի պատճառով։ Կազմակերպության գործադիր կառավարման անդամների թիվը նույնպես կրճատվել է 14-ից մինչև 7, ասաց Գեբրեյեսուսը։

ԱՀԿ քարտուղարությունն արդեն քայլեր է ձեռնարկել՝ կրճատելու ճանապարհորդության, գնումների, վաղաժամ թոշակի անցնելու և «շատ ավելին» ծախսերը, ասաց նա։

«Այս միջոցառումները նպաստել են բացը կրճատելուն, բայց մենք դեռևս այլընտրանք չունենք, քան կրճատել մեր աշխատակիցների թիվը», — ասել է կազմակերպության ղեկավարը Առողջապահության գլխավոր ասամբլեայի 78-րդ նստաշրջանի բացման ժամանակ։

Նա հավելեց, որ ԱՄՆ-ի կողմից ֆինանսավորման կրճատման պատճառով առնվազն 70 երկրներում հիվանդները զրկվում են բուժումից, առողջապահական հաստատությունները փակվում են, իսկ առողջապահության ոլորտի աշխատողները կորցնում են իրենց աշխատանքը։

Միացյալ Նահանգները ԱՀԿ-ի ամենամեծ ֆինանսավորողն է (տարեկան ընդհանուր ֆինանսավորման 18%-ը): Դոնալդ Թրամփի առաջին գործադիր հրամանագրերից մեկը 2025 թվականի հունվարին իր պաշտոնավարման երդմնակալությունից հետո Միացյալ Նահանգների դուրսբերումն էր ԱՀԿ-ից, որին նա մեղադրեց «COVID-19 համավարակի հետ կապված սխալ կառավարման» և «անհրաժեշտ բարեփոխումներ չիրականացնելու» մեջ։

Այնուհետև ԱՀԿ-ն սառեցրեց նոր հավաքագրումը, կասեցրեց ներդրումները և սահմանափակեց ճանապարհորդությունները։ ԱՀԿ-ն 55 տարեկանից բարձր աշխատակիցներին առաջարկել է կամավոր վաղաժամ թոշակի անցնելու հնարավորություն՝ չորս ամսվա աշխատավարձով։