Եվրամիությունը պատրաստվում է Ռուսաստանի դեմ մի քանի պատժամիջոցների «ամենամեծ» միաժամանակյա կիրառմանը, որի մասին կհայտարարվի ԵՄ Արտաքին գործերի խորհրդի մայիսի 20-ին կայանալիք նիստում: Այս մասին հայտարարել է ԵՄ բարձրաստիճան պաշտոնյան Բրյուսելում ուրբաթ՝ մայիսի 16-ին, կայացած ճեպազրույցի ժամանակ:
Արտաքին գործերի նախարարները կհաստատեն Ռուսաստանի Դաշնության նկատմամբ սահմանափակող միջոցառումները չորս պատժամիջոցների ռեժիմների շրջանակներում՝ Ուկրաինայում պատերազմի, մարդու իրավունքների խախտումների, հիբրիդային պատերազմի և քիմիական զենքի կիրառման համար։
Ընդհանուր առմամբ, կընդունվի ավելի քան 130 անհատական պատժամիջոց, այդ թվում՝ Ռուսաստանի ռազմարդյունաբերական համալիրի, «ստվերային նավատորմի» և դրա հանցակիցների, երրորդ երկրներից Ռուսաստան պատժամիջոցների տակ գտնվող ապրանքների մատակարարների, ինչպես նաև քարոզչության և ապատեղեկատվության տարածողների դեմ։
Ռուսաստանի կողմից Ուկրաինայում իրականացված ագրեսիայի համար պատժամիջոցների 17-րդ փաթեթի շրջանակներում պատժամիջոցների ցուցակներին կավելացվեն 75 նոր իրավաբանական և ֆիզիկական անձինք, ինչպես նաև «ստվերային նավատորմի» 200 նավ։ Սա ԵՄ պատժամիջոցների ցուցակում ընդգրկված անձանց թիվը հասցնում է ավելի քան 2500-ի, իսկ նավերի թիվը՝ ավելի քան 300-ի։
Հիբրիդային գործունեության համար ԵՄ պատժամիջոցների ռեժիմի շրջանակներում կներդրվեն ոլորտային միջոցառումներ, ինչպես նաև անհատական պատժամիջոցներ Ռուսաստանի Դաշնությունում 27 ֆիզիկական և իրավաբանական անձանց նկատմամբ։
Մարդու իրավունքների խախտումների համար ԵՄ-ի կողմից սահմանված գլոբալ պատժամիջոցների ռեժիմի շրջանակներում, պատժամիջոցների ցանկում կավելացվեն Ռուսաստանից ևս 28 ֆիզիկական և իրավաբանական անձինք։
Բացի այդ, ԵՄ պաշտոնյան հայտարարեց Ռուսաստանի դեմ քիմիական զենքի օգտագործման համար նախատեսված պատժամիջոցների կիրառման մասին։ Նրա խոսքով՝ խոսքը զանգվածային անկարգությունները ճնշելու քիմիական միջոցների մասին է, որոնք ռուսական կողմն օգտագործում է որպես Ուկրաինայում պատերազմ վարելու միջոց։
Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ Եվրամիությունն արդեն պատրաստում է Ռուսաստանի դեմ նոր լայնածավալ պատժամիջոցներ։ Այս միջոցառումները դեռևս չեն հաստատվել ԵՄ խորհրդի կողմից, և դրանց քննարկումը միայն նախատեսված է, ուստի նոր պատժամիջոցների ժամկետների և շրջանակի վերաբերյալ մանրամասները դեռևս հայտնի չեն։ Տիրանայում Եվրոպական քաղաքական համայնքի գագաթնաժողովում ելույթ ունեցած ֆոն դեր Լեյենի խոսքով՝ նոր պատժամիջոցների փաթեթը կներառի «Հյուսիսային հոսք» և «Հյուսիսային հոսք 2» գազատարների նկատմամբ սահմանափակող միջոցառումներ, ռուսական «ստվերային նավատորմի» նավերի սև ցուցակում նոր անունների ավելացում, նավթի գնի առաստաղի իջեցում և Ռուսաստանի ֆինանսական հատվածի նկատմամբ լրացուցիչ պատժամիջոցներ։
«Մենք պետք է ուժեղացնենք նախագահ Պուտինի վրա ճնշումը, մինչև նա պատրաստ լինի խաղաղության», — ասել է Եվրահանձնաժողովի ղեկավարը։
