Hyundai Motor Group-ը մտածում է ռուսական շուկա վերադառնալու մասին։ Այս մասին հաղորդում են կորեական լրատվամիջոցները։ 2023 թվականի դեկտեմբերին ընկերությունը պաշտոնապես լքել էր շուկան՝ Սանկտ Պետերբուրգում գտնվող իր գործարանը վաճառելով խորհրդանշական՝ 140 հազար վոնով կամ մոտ 100 դոլարով։ Կարևոր է նշել, որ գործարքի մեջ ներառված է եղել հետգնման օպցիոն, որը կոնգլոմերատին թույլ է տալիս վերադարձնել գործարանը վաճառքից հետո երկու տարվա ընթացքում։
Carscoops-ի տվյալներով՝ վերջին ամիսներին Hyundai-ն և Kia-ն Ռուսաստանում գրանցել են ավելի քան 20 ապրանքային նշաններ՝ ավտոմեքենաների, պահեստամասերի և աքսեսուարների համար։
Հոդվածում նշվում է, որ դժվար չէ զարմանալ Hyundai-ի վերադարձի ցանկության վրա. 2021 թվականին Hyundai և Kia ապրանքանիշերը ողջ երկրում վաճառել են 354 հազար ավտոմեքենա։ Գագաթնակետին նրանք զբաղեցնում էին նոր ավտոմեքենաների շուկայի 23.3%-ը։
Hyundai-ի հետաքրքրությունը ռուսական շուկա վերադառնալու նկատմամբ առաջացել է Ռուսաստանի և Ուկրաինայի միջև շարունակվող խաղաղ բանակցությունների ֆոնին։ Բացի այդ, 2024 թվականի հոկտեմբերից Ռուսաստանը բարձրացրել է ներմուծվող ավտոմեքենաների մաքսերը, ինչը բացասաբար է ազդել չինական ապրանքանիշերի վրա։ 2024 թվականի առաջին կեսին Չինաստանից ներմուծված ավտոմեքենաները կազմել են ողջ ներմուծման ավելի քան 80%-ը, սակայն 2025 թվականի առաջին երկու ամիսներին այդ ցուցանիշը կիսով չափ նվազել է։
«Մինչև Թրամփը և Պուտինը համաձայնության գան հրադադարի վերաբերյալ, Hyundai Motor-ը պատրաստվում է վերադառնալ ռուսական շուկա», – նշել է Դելիմ համալսարանի պրոֆեսոր Կիմ Պիլ Սուն կորեական լրատվամիջոցին տված հարցազրույցում։
«Հաշվի առնելով Hyundai-ի՝ ԱՄՆ արտահանման հետ կապված ռիսկերն, անհրաժեշտ է բիզնեսի տարածաշրջանների դիվերսիֆիկացում։ Ընկերությունն արդեն ունի փորձ ռուսական շուկայում, և ռուս գնորդները նախընտրում են Hyundai և Kia ավտոմեքենաները։ Նրանք պատրաստվում են օգտվել հետգնման օպցիոնից՝ իրենց ռուսական բիզնեսը վերականգնելու համար»։
Բաժանորդագրվեք մեր ալիքին Telegram-ում
