Մոսկվան և Վաշինգտոնը, խաղաղ կարգավորման այլ հարցերի շարքում, քննարկում են Եվրոպա ռուսական գազի մատակարարումների հնարավոր վերականգնումը, հաստատել է Ռուսաստանի նախագահի օգնական Յուրի Ուշակովը։
«Մենք այս հարցը բարձրացնում ենք ամերիկացիների հետ, բայց ազնիվ ասած՝ չեմ հասկանում՝ էլ ում հետ», — ասել է նա «Ինտերֆաքսին»։
Մեկ օր առաջ՝ մայիսի 8-ին, Reuters-ի աղբյուրները հայտնել էին ԱՄՆ-ի և Ռուսաստանի միջև համապատասխան բանակցությունների մասին։ Նրանց կարծիքով՝ «ԵՄ գազի շուկայում Մոսկվայի դերի վերականգնումը կարող է նպաստել Ռուսաստանի նախագահ Վլադիմիր Պուտինի հետ խաղաղության համաձայնագրի կնքմանը»։
Գործակալության տվյալներով՝ Վաշինգտոնը ռուսական գազի եվրոպական շուկա վերադարձի հարցում իր միջնորդական դերը դիտարկում է որպես Մոսկվայի և Կիևի միջև խաղաղության համաձայնագրի կնքման քայլերից մեկը։
Քննարկվող գործարքի տարբերակների շարքում է ամերիկացի ներդրողների կողմից «Հյուսիսային հոսք» նախագծում կամ «Գազպրոմում» բաժնետոմսերի ձեռքբերումը։
Միևնույն ժամանակ, մայիսի 6-ին Եվրահանձնաժողովը ներկայացրեց ռուսական էներգակիրների ներմուծումը Եվրամիություն դադարեցնելու «ճանապարհային քարտեզի» նախագիծը։
Ծրագրի համաձայն՝ ԵՄ-ն նպատակ ունի մինչև 2027 թվականի վերջը դադարեցնել ռուսական գազի բոլոր ներմուծումները, խստացնել Ռուսաստանի նավթակիրների «ստվերային նավատորմի» դեմ միջոցառումները և սահմանափակել Ռուսաստանից ուրանի և այլ միջուկային նյութերի մատակարարման նոր պայմանագրերը։
Բաժանորդագրվեք մեր ալիքին Telegram-ում
