Չինաստանը «խլեց» Ռուսաստանից գազի մեծ զեղչը

Ռուսաստանի կառավարությունը նախատեսել է Չինաստանի համար ռուսական գազի գնի հետագա նվազեցում, հաղորդում է Reuters-ը՝ հղում անելով տնտեսական զարգացման նախարարության կողմից պատրաստված սոցիալ-տնտեսական զարգացման թարմացված կանխատեսմանը։

Անցյալ տարի «Գազպրոմի» մատակարարումները, որոնք իրականացվում են 2019 թվականին գործարկված «Սիբիրի ուժը» խողովակաշարով, Չինաստանին արժեցել են 267,6 դոլար հազար խորանարդ մետրի համար։ Գինը 30%-ով ցածր էր, քան վճարում էին Եվրոպայի և Թուրքիայի հաճախորդները (376.9 դոլար հազար խորանարդ մետրի համար):

2025 թվականին Չինաստանի համար «Գազպրոմ» գազի գինը կնվազի մինչև 247,3 դոլար, մինչդեռ եվրոպացի և թուրք գնորդների համար, ընդհակառակը, այն կբարձրանա մինչև 403 դոլար հազար խորանարդ մետրի համար, ասվում է Տնտեսական զարգացման նախարարության նյութերում։ Այսպիսով, զեղչը կհասնի 39%-ի և կգերազանցի 150 դոլարը հազար խորանարդ մետրի համար։

2026 թվականի համար կառավարությունը նախատեսում է Չինաստանի համար գազի գնի հետագա, աննշան նվազում՝ մինչև 241.8 դոլար հազար խորանարդ մետրի համար։

Անցյալ տարի «Գազպրոմը» Չինաստան է մղել 31 միլիարդ խորանարդ մետր գազ, իսկ այս տարի «Սիբիրի ուժը» հասցրել է տարեկան 38 միլիարդ խորանարդ մետր նախագծային հզորության։ Սակայն սա Ռուսաստանին փոխհատուցում է պատերազմից առաջ Եվրամիություն արտահանման 20%-ից էլ պակասը, որը իր գագաթնակետին հասել էր 200 միլիարդ խորանարդ մետրի։

Այդ ժամանակվանից ի վեր «Գազպրոմի» մատակարարումները դեպի այն շուկա, որը նախկինում իր ամենամեծն էր, կրճատվել են գրեթե յոթ անգամ՝ հասնելով նվազագույնի 1970-ականների երկրորդ կեսից ի վեր՝ 28 միլիարդ խորանարդ մետր 2023 թվականին և 32 միլիարդ՝ 2024 թվականին։