ԱՄՆ-Իրան բանակցություններում առաջընթացը ազդում է նավթի գների վրա

Նավթի գները երկուշաբթի՝ ապրիլի 21-ին, անկում ապրեցին՝ ԱՄՆ-Իրան բանակցություններում առաջընթացի նշանների ֆոնին, մինչդեռ ներդրողները շարունակում էին զգուշանալ, որ Վաշինգտոնի կողմից առևտրային գործընկերների նկատմամբ սահմանված մաքսատուրքերը կստեղծեն տնտեսության համար անկման ռիսկեր, որոնք կարող են ազդել վառելիքի պահանջարկի վրա։

Այս մասին հաղորդում է Reuters-ը։

Brent տեսակի նավթի ֆյուչերսները նվազել են 2.77%-ով՝ հասնելով մեկ բարելի համար 66.08 դոլարի, WTI տեսակի նավթի ֆյուչերսները՝ 2.91%-ով՝ հասնելով մեկ բարելի համար 62.8 դոլարի։

«ԱՄՆ-ի և Իրանի միջև բանակցությունների դրական բնույթը հիմք է տալիս հնարավոր համարելու գործարքը», — ասել է Onyx Capital Group-ի ներկայացուցիչ Հարրի Չիլինկիրյանը։

«Արդյունքում, իրանական նավթը կմնա շուկայում»։

Նա հավելեց, որ Զատկի տոների պատճառով շուկաներում իրացվելիության նվազումը կարող է մեծացնել գների տատանումների ամպլիտուդը։

Սաուդյան Արաբիան, Ռուսաստանը, Իրաքը, ԱՄԷ-ն, Քուվեյթը, Ղազախստանը, Ալժիրը և Օմանը մայիսից օրական 411,000 բարելով կավելացնեն նավթի արտադրությունը՝ մոտ երեք անգամ ավելի, քան նախատեսված էր սկզբում։