Մասկը հոգնել է և հեռանում է

ԱՄՆ կառավարության արդյունավետության դեպարտամենտի (DOGE) ղեկավար Իլոն Մասկը մտադիր է լքել իր պաշտոնը՝ «ձախակողմյան ուժերի ագրեսիվ հարձակումներից» հոգնածության պատճառով, հաղորդում է The Washington Post-ը՝ հղում անելով անանուն աղբյուրին։

Հրատարակության տվյալներով՝ Մասկի՝ որպես հատուկ կառավարական աշխատակցի կարգավիճակի ժամկետը լրանում է 2025 թվականի մայիսին, և պարզ չէ՝ այն կերկարաձգվի՞, թե՞ ոչ։

«Մասկը ցանկանում է հեռանալ, քանի որ հոգնել է այն բանից, ինչը նա համարում է ձախերի կողմից եկող տհաճ և անբարոյական հարձակումների հոսք», — ասվում է հոդվածում։

Միևնույն ժամանակ, Մասկը վստահ է DOGE-ի ապագայի հարցում, քանի որ իր թիմն արդեն իսկ ամուր ինտեգրված է մի շարք դաշնային գործակալությունների մեջ։ Ինչպես նշել է Սպիտակ տան բարձրաստիճան պաշտոնյան, որը խնդրել է անանուն մնալ, DOGE-ի նվաճումները «աննախադեպ են և ինքնին խոսում են իրենց մասին»։

ԱՄՆ նախագահ Դոնալդ Թրամփի կողմից ստեղծված DOGE-ը նախատեսված է «անօգուտ ծախսերը կրճատելու և դաշնային գործակալությունները վերակառուցելու» համար։

ԱՄՆ Ներկայացուցիչների պալատի խոսնակ Մայք Ջոնսոնն ավելի վաղ հայտարարել էր, որ կառավարության արդյունավետության գրասենյակը բացահայտել է ԱՄՆ կառավարության «շոկային» ծախսեր, որոնք չեն հաստատվել Կոնգրեսի կողմից։