Եվրոպայում գազի պահեստարաններ մղվող ծավալները հասել են առավելագույնի

GIE-ի տվյալներով՝ ապրիլի 19-ին պահեստարաններ մղվել է 321 միլիոն խորանարդ մետր գազ։ Սա ամենաբարձր օրական ցուցանիշն է նախորդ տարվա օգոստոսից ի վեր։ Այնուամենայնիվ, ընդհանուր պաշարները այս ամսին 41%-ով պակաս են նախորդ տարվա նույն ժամանակահատվածի համեմատ, վկայում են ТАСС-ի հաշվարկները՝ հիմնված Gas Infrastructure Europe (GIE)-ի տվյալների վրա։ Միաժամանակ, ապրիլին Եվրոպայի կողմից հեղուկացված բնական գազի (ՀԲԳ) ներմուծումը շարունակում է ռեկորդային տեմպերով։

Ապրիլի 19-ին գազի մղումը կազմել է 321 միլիոն խորանարդ մետր, իսկ դուրսբերումը՝ ընդամենը 13 միլիոն խորանարդ մետր։ Ապրիլին գազի մղումը 8%-ով պակաս, իսկ դուրսբերումը 1%-ով ցածր է նախորդ տարվա համեմատ։

Եվրոպական երկրներում ձմեռային ջեռուցման սեզոնին եղած բարձր սպառման ֆոնին, պահեստարաններում գազի պաշարների ընդհանուր ծավալը 2025 թվականի ապրիլի սկզբին կազմել է 40,1 մլրդ խմ, ինչը 41%-ով պակաս է, քան մեկ տարի առաջ։ Սա տվյալ ամսաթվի համար յոթերորդ ամենաբարձր ցուցանիշն է պատմության ընթացքում։

Այժմ պահեստարանները լցված են միայն 36.71%-ով, ինչը 10.78 տոկոսային կետով պակաս է վերջին հինգ տարվա միջին ցուցանիշից։ Նախորդ տարվա նույն ժամանակահատվածում լցվածությունը կազմել էր 62.1%։

Եվրոպական հանձնաժողովի պահանջների համաձայն, ԵՄ երկրների պահեստարանները պետք է լցված լինեն առնվազն 90%-ով մինչև նոյեմբերի 1-ը։ Այս պահանջը նույնպես խթանում է գազի գների աճը եվրոպական շուկայում։

ТАСС-ի հաշվարկներով՝ Եվրոպայի կողմից առաջիկա սեզոնում պահեստարաններ մղվող գազի զուտ ծավալը պետք է կազմի առնվազն 61 միլիարդ խորանարդ մետր, ինչը մոտ 50%-ով ավելի է, քան նախորդ տարի, և հանդիսանում է պատմության մեջ ամենաբարձր ցուցանիշներից մեկը։

Ձմեռային ջեռուցման սեզոնը Եվրոպայում ավարտվել է մարտի 28-ին, տևելով 151 օր։ Այդ ընթացքում ԵՄ երկրներըպահեստարաններից դուրս են բերել ավելի քան 74 միլիարդ խորանարդ մետր գազ, իսկ զուտ դուրսբերումը կազմել է 69 միլիարդ խորանարդ մետր, ինչը 54%-ով ավելին է նախորդ տարվա համեմատ։