Միլիարդատեր Իլոն Մասկի SpaceX-ը և նրա գործընկերները առաջատար դիրք են գրավում նախագահ Դոնալդ Թրամփի «Ոսկե գմբեթ» հրթիռային վահանի կարևորագույն մասը ապահովելու համար մրցավազքում։
Այս մասին հաղորդում է Reuters-ը՝ հղում անելով իրավիճակին ծանոթ վեց աղբյուրների։
SpaceX-ը համագործակցում է ծրագրային ապահովում արտադրող Palantir-ի և անօդաչու թռչող սարքերի արտադրող Anduril-ի հետ։ Հատկանշական է, որ երեք ընկերություններն էլ հիմնադրվել են Թրամփի կողմնակիցների կողմից։
Գործակալության տվյալներով՝ «Ոսկե գմբեթի» վերաբերյալ որոշումների կայացման գործընթացը գտնվում է վաղ փուլում, և կարող են փոխվել ինչպես մասնակիցների կազմը, այնպես էլ նախագծի կառուցվածքը։
Նախնական պլանի համաձայն՝ ընկերությունները մտադիր են 400-ից 1000 արբանյակ ուղարկել ուղեծիր՝ հրթիռներ հայտնաբերելու համար։ Բացի այդ, կլինեն մոտ 200 մարտական արբանյակներ՝ հրթիռներով կամ լազերներով, որոնք կկործանեն հայտնաբերված սպառնալիքները։ Սակայն, ըստ աղբյուրների, SpaceX-ը, ամենայն հավանականությամբ, չի մասնակցի արբանյակների զինմանը։
Պենտագոնը հրաժարվել է պատասխանել Reuters-ի կոնկրետ հարցերին՝ միայն ասելով, որ նախագահին կառաջարկի տարբերակներ «գործադիր հրամանագրի և Սպիտակ տան կողմից սահմանված ժամանակացույցի շրջանակներում»։
SpaceX-ը առաջարկել է նախագծում իր դերը սահմանել որպես «բաժանորդագրական ծառայություն», ինչը նշանակում է, որ կառավարությունը կվճարի տեխնոլոգիային մուտք գործելու համար, բայց չի լինի դրա սեփականատերը։ Նման մոդելը, ըստ երկու աղբյուրների, կարող է շրջանցել Պենտագոնի որոշ գնման ձևականություններ և արագացնել համակարգի տեղակայումը։ Սակայն դա նաև ռիսկեր է պարունակում. կառավարությունը կարող է կորցնել նախագծի մշակման և դրա գնագոյացման նկատմամբ վերահսկողությունը։
Պենտագոնն արդեն մտահոգություն է հայտնել այս մոտեցման վերաբերյալ։ Բաժանորդագրության մոդելը անսովոր կլիներ նման լայնածավալ պաշտպանական նախաձեռնության համար։
Այլ հավանական մասնակիցների թվում են խոշոր կապալառուներ, ինչպիսիք են Northrop Grumman-ը, Boeing-ը և RTX-ը։ Ընդհանուր առմամբ, ծրագրի նկատմամբ հետաքրքրություն է հայտնել ավելի քան 180 ընկերություն։
Բաժանորդագրվեք մեր ալիքին Telegram-ում
