Ամենաեկամտաբեր մասնագիտությունները՝ Ռուսաստանում

Ռուսաստանում ամենաեկամտաբեր մասնագիտությունները համարվել են անշարժ գույքի գործակալը (178 204 ռուբլի), frontend ծրագրավորողը (153 864 ռուբլի) և նախագծերի ղեկավարը (145 936 ռուբլի): Այս տվյալները ներկայացված են Dream Job գործատուի բրենդի զարգացման հարթակի ուսումնասիրության մեջ, որի հետ ծանոթացել են «Известия»-ն ապրիլի 16-ին։

Փորձագետների տվյալներով՝ երկրի միջին աշխատավարձը կազմում է 64 561 ռուբլի։ Մոսկվայում այդ ցուցանիշը մոտ 30%-ով բարձր է։ Առաջատարների շարքում են արդյունահանող արդյունաբերություն ունեցող քաղաքներն ու հյուսիսային հավելավճարներով բնակավայրերը՝ Նիժնևարտովսկ (83 482 ռուբլի), Խաբարովսկ (74 395 ռուբլի), Սուրգուտ (68 963 ռուբլի)։

Միլիոնանոց քաղաքներից Սանկտ Պետերբուրգը (78 343 ռուբլի) և Կազանը (70 806 ռուբլի) փոքր տարբերությամբ գերազանցել են Եկատերինբուրգին (69 565 ռուբլի) և Նովոսիբիրսկին (68 283 ռուբլի)։ Միևնույն ժամանակ, Մոսկվայում ամենաբարձր վարձատրվող մասնագետներն են բրոքերները (297 727 ռուբլի), Product Owner-ները (296 664 ռուբլի) և գլխավոր տնօրենները (281 053 ռուբլի)։

Սանկտ Պետերբուրգում առաջատարներն են անշարժ գույքի գործակալները (187 500 ռուբլի), նախագծերի ղեկավարները (139 150 ռուբլի) և frontend ծրագրավորողները (137 211 ռուբլի)։

Նովոսիբիրսկում և Եկատերինբուրգում առաջատար մասնագիտությունները եկամտով՝ վարորդ-էքսպեդիտորներ, առաջատար ինժեներներ, ֆինանսական խորհրդատուներ, լոգիստներ և վաճառքի մենեջերներ։ Այստեղ վարկանիշի առաջին և տասներորդ տեղերի միջև տարբերությունը զգալի չէ՝ 92 հազարից մինչև 74 հազար ռուբլի։

Կազանում աշխատավարձով առաջատարներն են հաճախորդների հետ աշխատանքի մենեջերները (89 357 ռուբլի) և վաճառքի բաժնի ղեկավարները (88 հազար ռուբլի)։

«Աշխատաշուկան ավելի ակտիվ ու թափանցիկ է դարձել։ Աճում են ոչ միայն ծրագրավորողների, այլև մենեջերների, վաճառողների, լոգիստների աշխատավարձերը՝ երկրի տարբեր շրջաններում։ Աշխատակիցներն ավելի ու ավելի հաճախ են կիսվում իրենց եկամուտների մասին տվյալներով, ինչը շուկան ավելի հասկանալի է դարձնում թե՛ աշխատանք որոնողների, թե՛ գործատուների համար», — նշել է Dream Job-ի գործադիր տնօրեն Բորիս Կուրբատովը։

Ավելի վաղ՝ հունվարի 10-ին, հաղորդվել էր, որ հարցված ռուսների մեծ մասը (57%) մտադիր է 2025 թվականին ակտիվորեն զբաղվել իրենց կարիերայով։ Միևնույն ժամանակ, մեկ տարի առաջ նման մտադրություն հայտնել էր հարցվածների 65%-ը՝ համաձայն hh.ru-ի վերլուծաբանների հետազոտության։