S&P 500-ի անկումը դարձավ առավելագույնը վերջին 5 տարվա ընթացքում

S&P 500 ինդեքսը հինգշաբթի, ապրիլի 3-ին, անցել է 2020 թվականից ի վեր իր ամենավատ օրը։ ԱՄՆ-ի ֆոնդային շուկայում սկսվել են զանգվածային վաճառքներ, երբ ԱՄՆ նախագահ Դոնալդ Թրամփը հայտարարեց վերջին հարյուր տարվա ընթացքում ամենաբարձր մաքսատուրքերի մասին։

S&P 500-ը նվազել է 4,8%-ով՝ 5396,52 կետի, ինչը դարձել է ամենամեծ անկումը 2020 թվականի հունիսից ի վեր։ Այն արդեն 12%-ով ցածր է իր ամենաբարձր արժեքից, որը գրանցվել էր փետրվարին։ ԱՄՆ ֆոնդային շուկայի ընդհանուր կապիտալիզացիան մեկ օրում կորցրել է $2,5 տրիլիոն, քանի որ ներդրողները սկսել են հեռանալ ռիսկային ակտիվներից՝ նախընտրելով պարտատոմսեր և ճապոնական իենը։ Առավել մեծ վնասներ կրել են այն ընկերությունները, որոնց մատակարարման շղթաները առավել կախված են արտասահմանյան արտադրությունից։

Nasdaq 100-ը կորցրել է 5,4%, ինչը նրա համար դարձել է ամենավատ օրն 2022 թվականի սեպտեմբերից ի վեր։ Մասնավորապես, Apple-ի բաժնետոմսերը անկում են ապրել 9%-ով, քանի որ Citi-ի գնահատմամբ՝ ընկերության արտադրության 90%-ից ավելին գտնվում է Չինաստանում, որը մաքսատուրքերից ամենաշատը տուժած երկրներից է։ NVIDIA-ի բաժնետոմսերը նվազել են 7,8%-ով, Amazon-ը՝ 8,98%-ով, Alphabet-ը՝ 3,9%-ով, Tesla-ն՝ 5,47%-ով, իսկ Nike-ը՝ 14%-ով։

Ներդրողները հատկապես արագ ձերբազատվում էին այն ընկերությունների բաժնետոմսերից, որոնք վերջին երկու տարիներին ֆոնդային շուկայի աճի առաջատարներից էին։ Արժեթղթերի շուկայում անկայունությունը կտրուկ աճել է․ VIX (CBOE Volatility Index) ինդեքսը գերազանցել է 30 կետի սահմանը, դառնալով ամենաբարձր ցուցանիշը այս տարվա ընթացքում։

Ապրիլի 3-ին Դոնալդ Թրամփը հայտարարեց 10%-անոց մաքսատուրքերի ներդրման մասին բոլոր ներմուծվող ապրանքների համար և լրացուցիչ ավելի բարձր մաքսատուրքեր՝ մոտ 60 երկրների համար՝ ԱՄՆ-ի առևտրային դեֆիցիտը հավասարակշռելու նպատակով։

Նախագահ Թրամփը նշել է, որ ԱՄՆ-ի նոր մաքսատուրքերն ընդամենը կեսն են այն մաքսատուրքերի, որոնք այս երկրները սահմանել են ԱՄՆ-ի նկատմամբ։ Թրամփի ներկայացրած աղյուսակի համաձայն՝

• Չինաստանի մաքսատուրքերը՝ 34%,

• Եվրամիության՝ 20%,

• Հնդկաստանի՝ 26%,

• Վիետնամի՝ 46%,

• Թայվանի՝ 32%։

Freedom Capital Markets-ի գլխավոր վերլուծաբան Ջեյ Վուդսը նշել է, որ «շուկայում տիրում է խուճապ»։ Նրա խոսքով, Թրամփն ու ֆինանսների նախարար Սքոթ Բեսսենթը փորձում են «վաճառել» այս առևտրային պատերազմը ամերիկացիներին, սակայն շուկան չի ընդունում դա։

Baker Boyer Bank-ի ներդրումային տնօրեն Ջոն Կաննիսոնը նշել է, որ մաքսատուրքերի ծավալը և դրանց ազդեցությունը տարբեր երկրների վրա մեծ ցնցում է առաջացրել։ Նրա կարծիքով, սա կարող է լինել երկարաժամկետ առևտրային պատերազմի առաջին քայլը, որն էականորեն կազդի շուկաների և համաշխարհային տնտեսության վրա։