Ամերիկյան բաժնետոմսերը նվազել են. Տեխնոլոգիական հսկաները նույնպես զգալի կորուստներ են կրել

S&P 500 ինդեքսը 2025 թվականի առաջին երեք ամիսներին անկում է գրանցել գրեթե 5%-ով, ինչը պայմանավորված է տնտեսության թուլացման վերաբերյալ աճող մտահոգություններով, հայտնում է The Financial Times-ը։

2025 թվականի սկիզբը դարձել է Ուոլ Սթրիթի համար վերջին երեք տարիների ամենաբարդ շրջանը։ Մասնագետները նշում են, որ Դոնալդ Թրամփի սակագնային քաղաքականության հետևանքով առաջացած ստագֆլյացիայի վտանգը հիմնական գործոնն է, որը հանգեցրել է ամերիկյան ֆոնդային շուկայի անկմանը։ Հունվարից մարտ ընկած ժամանակահատվածում S&P 500-ը կորցրել է 4,6%, ինչը վատագույն սկիզբն է 2022 թվականից ի վեր, իսկ Nasdaq-ը նվազել է 10,4%-ով։

Տնտեսական անկայունության ուժեղացմանը զուգահեռ վատթարացել են նաև ինֆլյացիոն կանխատեսումները։ Goldman Sachs-ը բարձրացրել է ԱՄՆ-ում տարվա վերջի համար կանխատեսվող ինֆլյացիայի մակարդակը և մեծացրել ռեցեսիայի հավանականությունը մինչև 35%` նշելով, որ նվազող գործարար ակտիվությունն ավելի ու ավելի է ազդում սպառողների վարքագծի վրա։

Ակնկալվում է, որ գալիք չորեքշաբթի օրը Թրամփը կհայտարարի նոր մաքսատուրքերի մասին, ինչը կարող է է’լ ավելի մեծ ճնշում գործադրել տնտեսության վրա։

Տեխնոլոգիական հսկաները նույնպես զգալի կորուստներ են կրել․

• Nvidia-ի բաժնետոմսերը նվազել են մոտ 20%-ով

• Tesla-ն կորցրել է իր արժեքի 36%-ը

• Apple և Microsoft ընկերությունների բաժնետոմսերը նվազել են 10%-ով

Բացի տեխնոլոգիական ոլորտից, դժվարություններ են գրանցվել նաև սպառողական շուկայում․

• Nike-ի բաժնետոմսերը նվազել են 16%-ով՝ վաճառքների հետ կապված խնդիրների պատճառով

• FedEx-ը նվազեցրել է իր շահույթի կանխատեսումները, ինչի հետևանքով նրա բաժնետոմսերը անկում են գրանցել 13%-ով։

Միևնույն ժամանակ, Եվրոպական շուկաներն աճ են գրանցել․

• Լոնդոնի FTSE 100 և համաեվրոպական Stoxx 600 ինդեքսները աճել են 5%-ով, ինչը մեծացրել է ներդրողների հետաքրքրությունը եվրոպական շուկայի նկատմամբ։

Տնտեսական անորոշության ֆոնին ոսկու արժեքը ռեկորդային աճ է գրանցել՝ հասնելով 3128 դոլարի մեկ ունցիայի համար։

Իսկ ԱՄՆ-ի 10-ամյա պետական պարտատոմսերի եկամտաբերությունը նվազել է 4,21%-ով, ինչը վկայում է այն մասին, որ ներդրողները նախընտրում են անվտանգ ակտիվներ։