Պաղեստինամետ հաքերները հարձակվել են Մասկի սոցիալական ցանցի վրա

Պաղեստինամետ հաքերային Dark Storm Team խումբը ստանձնել է Իլոն Մասկի X սոցիալական ցանցի զանգվածային խափանումների պատասխանատվությունը: Այս մասին մարտի 11-ին գրել է Newsweek-ը։

Հրատարակության տվյալներով՝ հաքերային խումբը հիմնադրվել է 2023 թվականին։ Համայնքը հայտնի է նրանով, որ հիմնականում թիրախավորում է այն կազմակերպությունները, որոնք աջակցում են Իսրայելին Պաղեստինի հետ ռազմական հակամարտությունում:

Երկուշաբթի՝ մարտի 10-ին, զանգվածային DDoS հարձակում է տեղի ունեցել։ Սոցիալական ցանցի կայքը և հավելվածը չորս ժամից ավելի չաշխատեցին: Որոշ ժամանակ անց Dark Storm Team-ը հանրային Telegram ալիքում հայտարարեց, որ իրենց հաքերներն են հարձակվել հարթակի վրա։

Ինքը՝ Իլոն Մասկը, պնդում էր, որ ուկրաինական IP հասցեները, իբր, ներգրավված են հարթակի վրա կիբերհարձակման մեջ։ Գործարարի խոսքով՝ դրանում կարող էր ներգրավված լինել «համակարգված խումբ կամ մի ամբողջ պետություն»։