Հայաստանում նկատվում է տնտեսական քաղաքականության իրականացման նոր և ամբողջությամբ «թավշյա» մոտեցում։ Վերջերս աշխատավարձերի ցածր լինելու բողոքին ի պատասխան` իշխանությունները հակադարձեցին այն պատճառաբանությամբ, թե դա պայմանավորված է նրանով, որ նախկիններն աշխատավարձերը չեն բարձրացրել, և ներկայիս իշխանությունները որքան էլ վերանայում են, մեկ է, աշխատավարձերը ցանկալի մակարդակին չեն հասնում։
Ստացվում է` հեղափոխական իշխանությունները չեն կարողանում լուծել ցածր աշխատավարձի հիմքում ընկած տարիների ընթացքում ձևավորված խնդիրները։ Այս ամենը վերաբերում է նաև կենսաթոշակներին։
Պետությունը չպետք է հույսը դինի այն ավանդույթի վրա, որ մեծերի մասին հիմնականում հոգ են տանում զավակները։
Մեր ծնողները, տատիկներն ու պապկիները ՀՀ քաղաքացիներ են և անկախ ընտանեկան ավանդույթներից` պետք է ունենան արժանապատիվ ու ապահով ծերություն։
Եվրոպական ո՞ր երկրներում են ապրում ամենամեծ թվով աշխատող կենսաթոշակառուները. ԻՆՖՈԳՐԱՖԻԿԱ
Հետաքրքիր է դիտարկել Հայաստանում 2019-2024թթ․ կենսաթոշակառուների թվաքանակի և կենսաթոշակի միջին չափի դինամիկան․
Կենսաթոշակառուների թվաքանակը ՀՀ-ում կայուն կերպով աճել է։ Մասնավորապես, 2024թ․ 2019թ․ համեմատ նրանց թվաքանակն աճել է 7%-ով, իսկ 2024թ․ 2023թ․ համեմատ՝ 5%—ով՝ կազմելով 500,505 մարդ։ Միևնույն ժամանակ, կենսաթոշակի միջին չափը 2024թ․ 2019թ․ համեմատ աճել է 23%-ով, իսկ 2024թ․ 2023թ․ համեմատ՝ նվազել է 0․1%-ով՝ կազմելով ֏ 49,567։
Ընդ որում՝ 2024թ․ Երևանում կենսաթոշակառուների թվաքանակը կազմել է 187,863 մարդ, իսկ կենսաթոշակի միջին չափը՝ ֏ 52,395։
Մարզերում կենսաթոշակառուների թվաքանակով առաջատար են Կոտայքը` 45,266 մարդ, Շիրակը՝ 39,684 մարդ և Արարատը՝ 39,855 մարդ։
Կենսաթոշակի ամենաբարձր միջին չափը 2024թ․ դիտվել է Սյունիքի մարզում՝ ֏51,673։
Նկատենք նաև, որ ՀՀ-ում կենսաթոշակների գենդերային խզվածքը կազմում է 4%, ինչը նշակում է, որ տղամարդ թոշակառուների կենսաթոշակն ավելի բարձր է կին կենսաթոշակառուների կենսաթոշակից։
Մասնավորապես, 2024թ․ դրությամբ տղամարդ կենսաթոշակառուների կենսաթոշակի միջին չափը կազմել է ֏ 50,744, իսկ կին կենսաթոշակառուներինը՝ ֏ 48,790։
Երևանում արձանագրվել է կենսաթոշակների գենդերային խազվածքի առավելագույն մակարդակը՝ 8%, իսկ Տավուշի մարզում նվազագույն խզվածքը՝ -2%։
Կենսաթոշակների չնչին տարբերություն է առկա Արագածոտնի մարզում, որտեղ կենսաթոշակների գենդերային խզվածքը կազմում է ընդամենը 0․1%։
Բաժանորդագրվեք մեր ալիքին Telegram-ում
