Միգրանտների զանգվածային արտաքսումն ԱՄՆ գյուղատնտեսությանը ճգնաժամով է սպառնում

ԱՄՆ կառավարության կողմից անօրինական միգրանտների զանգվածային արտաքսումը կարող է երկրի գյուղատնտեսության ճգնաժամի հանգեցնել։ Այս մասին զգուշացնում է Financial Times թերթը։

Նրա խոսքով՝ Միացյալ Նահանգների գործարար համայնքը մտահոգություն է հայտնում, որ երկրի նոր նախագահ Դոնալդ Թրամփի ներգաղթի բարեփոխումը կարող է վնասակար ազդեցություն ունենալ երկրի տնտեսության գյուղատնտեսական հատվածի վրա, որը «չի կարող գործել առանց աշխատանքային միգրանտների»։

Հրատարակությունը նշում է, որ այս առումով հատկապես խոցելի կլինի կաթնամթերքի արդյունաբերությունը, քանի որ ԱՄՆ ներգաղթային քաղաքականությունը հնարավորություն է տալիս հատուկ վիզա ստանալ միայն մրգերի և բանջարեղենի հավաքագրմամբ զբաղվող սեզոնային աշխատողների համար, և նման տարբերակ չի տրամադրում կաթնամթերքի ֆերմայի աշխատողներին, ովքեր գալիս են ոչ թե մեկ սեզոնով, այլ երկար ժամանակով։

Ըստ Վիսկոնսինի ֆերմերային ֆեդերացիայի GR բաժնի ղեկավար Թայլեր Վենցլաֆի, շատ անօրինական ներգաղթյալներ «տարիներ շարունակ աշխատում են ֆերմաներում», և նրանց աշխատանքը զգալի ներդրում է ունենում տնտեսության մեջ: «Մենք աջակցում ենք հանցագործների արտաքսմանը, սակայն Վիսկոնսինում մեզ վստահելի աշխատուժ է անհրաժեշտ»,- ասել է Վենցլաֆը։ «Եթե աշխատանքային միգրանտներ չլինեն, չի լինի կաթ, պանիր, կարագ, պաղպաղակ:

«Մենք բոլորս ստիպված կլինենք դառնալ վեգան», — թերթին ասել է նահանգից ֆերմեր Ջոն Ռոզենոն: Նա կասկած է հայտնել, որ անօրինական ներգաղթյալների հոսքի սահմանափակումը կհանգեցնի «բնիկ ամերիկացիների» շրջանում աշխատողների թվի ավելացմանը։

Միչիգան ​​նահանգի համալսարանի տնտեսագետ Դանիել Օրտեգան ասում է, որ ԱՄՆ գյուղատնտեսության 2,4 միլիոն աշխատողների մոտ 40%-ին թույլ չեն տալիս աշխատել երկրում: