ԱՄՆ նախագահ Դոնալդ Թրամփը հրամանագիր է ստորագրել՝ օտար պետություններին ցուցաբերվող ամերիկյան օգնության վերագնահատման և վերախմբավորման մասին, որով նախատեսվում է 90 օրով դադարեցնել դրա տրամադրումը։
Հրամանագրում ասվում է, որ տրամադրվող օգնությունը համահունչ չէ ամերիկյան շահերին, շատ դեպքերում հակասում է ամերիկյան արժեքներին և ծառայում համաշխարհային խաղաղությունն ապակայունացնելու համար:
Պարզ չէ, թե որ ոլորտների վրա կանդրադառնա հրամանագիրը, հատկապես որ շատ ծրագրերի ֆինանսավորումը Կոնգրեսն արդեն հատկացրել է կամ պարտավոր է հատկացնել: Բացի այդ՝ հասկանալի չէ, թե արդյոք հրամանագիրը վերաբերում է նաև Ուկրաինային տրամադրվող ռազմական օգնությանը, որն առայսօր կազմում է մոտ 66 միլիարդ դոլար:
Միջազգային օգնությունը 90 օրով դադարեցնելու մասին նախագահ Դոնալդ Թրամփի հրամանը չի ազդում Ուկրաինային զենքի մատակարարումների վրա։ Այս մասին Պենտագոնից հաստատել են «Ամերիկայի ձայն»-ի ուկրաինական ծառայությանը։
«Ուկրաինային անվտանգության ոլորտում օգնությունը չի ենթարկվում արտաքին օգնության մասին վերջին հրամանագրի հետ կապված սահմանափակումների, քանի որ այն վերաբերում է միայն զարգացման ծրագրերին, այլ ոչ ռազմական օգնությանը», — ասվում է ՊՆ-ում։
Օգնության տրամադրումը կարող է վերսկսվել նշված ժամկետի ավարտից հետո՝ յուրաքանչյուր ծրագրի առանձին վերանայումից հետո։ Փաստաթղթում նշվում է, որ օտար երկրներին օգնության տրամադրման ոլորտը և դրանում տիրող բյուրոկրատիան «չեն համապատասխանում ամերիկյան շահերին և շատ առումներով հակասում են ամերիկյան արժեքներին»։
Բաժանորդագրվեք մեր ալիքին Telegram-ում
