ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանն այսօր «Արմենպրես» լրատվական գործակալությունում հրավիրված մամուլի ասուլիսի ժամանակ խոսել է նախադպրոցական կրթության համակարգի բարեփոխումների, ոլորտում առկա խնդիրների և առավելությունների, կրթական համակարգում իրականացվող մի շարք այլ աշխատանքների մասին:
Նախարարի տեղակալի խոսքով` նախադպրոցական կրթության համակարգի համար վերջին 2 տարիները բարդ են եղել` պայմանավորված համավարակով:
«Եթե դպրոցներում հնարավոր էր անցնել հեռավար կրթության, ապա նախադպրոցական կրթության համակարգի համար եղան լուրջ խնդիրներ երեխաների ընդգրկվածության առումով: 2020-2021 թվականներին որոշակի սահմանափակումներով էինք երեխաներին ընդգրկում համակարգ, ուստի վերջին 2 տարիների տվյալները չեն արտացոլում համակարգի իրական հզորությունը»,- նշել է նա:
Ժաննա Անդրեասյանի տեղեկացմամբ` 2019 թվականի ավարտին նախադպրոցական կրթության ոլորտում 0-5 տարեկան երեխաների ընդգրկվածության միջին ցուցանիշը 34,7 տոկոս է եղել: Ընդ որում` ակնհայտ տարբերություններ կան գյուղական և քաղաքային բնակավայրերի ընդգրկվածության ցուցանիշների միջև (39,6 տոկոս` քաղաքներում, 25,4 տոկոս` գյուղական բնակավայրերում): Հատկանշական է, որ առավել բարձր է 3-5 տարեկան երեխաների ընդգրկվածությունը, որը կազմել է 64,4 տոկոս:
«2020 թվականին շուրջ 6 տոկոսով աճել է 3-5 տարեկան երեխաների ընդգրկվածության հնարավորությունը` շնորհիվ նոր բացված նախակրթարանների և նոր հաստատությունների։ 2020 թվականին շուրջ 22 հաստատություններ են բացվել»,- ասել է ժ. Անդրեասյանը:
Նրա խոսքով` խնդիրներ դեռևս առկա են. Հայաստանում այս պահին շուրջ 236 հազար նախադպրոցական տարիքի երեխաներ, որից 62.000–ը՝ գյուղական համայնքներում, ընդգրկված չեն նախադպրոցական կրթական համակարգում։
Ըստ նրա` ՀՀ կառավարության հեռանկարային ծրագրերը հավակնոտ թիրախներ են սահմանել. Կառավարության ծրագրով նախադպրոցական տարիքի երեխաների ընդգրկվածությունը մինչև 2026 թվականը պետք է կազմի 85 տոկոս: Իսկ «ՀՀ կրթության՝ մինչև 2030 թվականը զարգացման պետական ծրագրով» նախատեսված է երեխաների ընդգրկվածությունը հասցնել 95 տոկոսի: Այս թիրախներին հասնելու համար մինչև 2026 թվականը նախատեսվում է վերակառուցել կամ կառուցել 500 նախակրթարան: Այս պահին 92 մանկապարտեզներում նորոգման և շինարարության աշխատանքներ են ընթանում, որոնցից 50-ում աշխատանքները կավարտվեն առաջիկայում:
Ժ. Անդրեասյանը խոսել է նաև նախադպրոցական հաստատություններ չունեցող համայնքներում այլընտրանքային, ծախսարդյունավետ մոդելների ներդրման մասին, որն հնարավորություն է ընձեռել մեծացնելու նախադպրոցական ծառայություններում ընդգրկված երեխաների թիվը: Նման բնակավայրերում ձևավորվել են ցածր արժողությամբ (ծախսարդյունավետ) նախադպրոցական այլընտրանքային կրթական ծրագրեր իրականացնող համայնքահեն հաստատություններ:
Ըստ փոխնախարարի` սա կարևոր ծառայության ձև է, որը ստեղծվել է այն բնակավայրերում, որտեղ չկան մանկապարտեզներ, երեխաների թիվը քիչ է: Ծրագրի իրագործման համար ՀՀ կառավարությունը մարզային 10 բնակավայրերի տրամադրվել է դրամական աջակցություն` մինչև 8 միլիոն դրամի չափով:
Մանրամասներն այստեղ։
Բաժանորդագրվեք մեր ալիքին Telegram-ում
