Վերջերս ՀՀ Էկոնոմիկայի նախարարի տեղակալ Էդգար Զաքարյանը հանդիպել է Իրանի Սպահան քաղաքի ոսկու և ոսկերչական իրերի արտահանման կոնսորցիումի գործադիր տնօրեն, Սպահան նահանգի Ոսկու, ոսկերչական իրերի, արծաթի և թանկարժեք քարերի արտահանողների և արտադրողների ասոցիացիայի տնօրենների խորհրդի նախագահ Մոհսեն Թալայ Մինայիի գլխավորած պատվիրակության հետ։
Հանդիպման արդյունքում քննարկվել են ոսկերչության ոլորտում համագործակցության, համատեղ արտադրության կազմակերպման և միջազգային այլ շուկաներ պատրաստի արտադրանքն արտահանելու հնարավորությունները։
Իրան-Հայաստան տնտեսական հարաբերությունների խորացումը միայն կնպաստի երկու երկրների բարգավաճմանը և ժողովուրդների միջև շփումների ակտիվացմանը։ Այս համատեքստում ոսկերչության ոլորտի ընտրությունը մեծ հնարավորություններ է ստեղծում, քանի որ երկու երկրներն էլ բավականին փորձ ունեն ոլորտում։
Հայաստանը արտահանում և ներմուծում է ոսկի (ներառյալ պլատինի գալվանական պատվածքով), ոսկու փոշի, ոսկերչական իրեր և իրեր ոսկուց կամ արծաթից վարպետների ձեռքի և դրանց մասեր թանկարժեք մետաղից։
Այս երեք ուղղություններով արտահանման ծավալներին կարող ենք ծանոթանալ ստորև․
ՊԵԿ տվյալների համաձայն՝ 2024թ․ առաջին կիսամյակում Հայաստանն արտահանել է 59 տոննա ոսկի (ներառյալ պլատինի գալվանական պատվածքով) և ոսկու փոշի` ＄4․1 մլրդ արժողությամբ։ Վերջինիս արտահանման ծավալները 2024թ․ առաջին կիսամյակում 2023թ․ նույն ժամանակահատվածի համեմատ աճել են շուրջ 12 անգամ։
Ոսկու (ներառյալ պլատինի գալվանական պատվածքով) և ոսկու փոշու արտահանման հիմնական ուղղություններն են եղել ԱՄԷ-ն, Հոնկոնգը և Չինաստանը։
2024թ․ առաջին կիսամյակում Հայաստանից արտահանվել են ոսկերչական իրեր 69 տոննա ծավալով՝ մոտ ＄710 մլն արժողությամբ։ Դրանց արտահանման ծավալները 2024թ․ առաջին կիսամյակում 2023թ․ նույն կիսամյակի համեմատ նվազել են 25%-ով։ Ոսկերչական իրերի արտահանման ծավալների հիմնական ուղղություններն են եղել ՌԴ-ն, Ղազախստանը և ԱՄԷ-ն։
Դեպի Ռուսաստան ոսկուց իրեր կամ արծաթից վարպետների ձեռքի և դրանց մասեր թանկարժեք մետաղից ապրանքախմբի արտահանման ծավալները 2024թ․ առաջին կիսամյակում կազմել են 104 կգ＄1000 արժողությամբ։
Որքա՞ն են կազմում առևտրային բանկերի և վարկային կազմակերպությունների շահույթի ծավալները. ԻՆՖՈԳՐԱՖԻԿԱ
Մյուս կողմից, 2024թ․ առաջին կիսամյակում վերոնշյալ երեք ապրանքախմբերի մասով ունենք մեծ ծավալների ներմուծում․
ՊԵԿ տվյալները փաստում են, որ 2024թ․ առաջին կիսամյակում Հայաստանը ներմուծել է 66 տոննա ոսկի (ներառյալ պլատինի գալվանական պատվածքով), ոսկու փոշի ＄4․4 մլրդ արժողությամբ։ Վերջինիս ներմուծման ծավալները 2024թ․ առաջին կիսամյակում 2023թ․ նույն ժամանակահատվածի համեմատ աճել են շուրջ 16 անգամ։
Ոսկին (ներառյալ պլատինի գալվանական պատվածքով), ոսկու փոշին ներմուծվել են հիմնականում ՌԴ-ից, ԱՄԷ-ից և Շվեյցարիայից։
2024թ․ առաջին կիսամյակում Հայաստան ներմուծվել են ոսկերչական իրեր 69 տոննա ծավալով՝ մոտ ＄34 մլն արժողությամբ. ներմուծման ծավալները 2024թ․ առաջին կիսամյակում 2023թ․ նույն կիսամյակի համեմատ աճել են մոտ 2 անգամ։ Ոսկերչական իրերի ներմուծման ծավալների հիմնական ուղղություններն են եղել Թայլանդը, Իսպանիան և Թուրքիան։
Իրեր ոսկուց կամ արծաթից վարպետների ձեռքի և դրանց մասեր թանկարժեք մետաղից ապրանքախմբի ներմուծման ծավալները 2024թ․ առաջին կիսամյակում կազմել են 881 կգ մոտ` ＄40 000 արժողությամբ։ Այս ապրանքատեսակները հիմնականում ներմուծվել են ՌԴ-ից, Իտալիայից և Գերմանիայից։
Բաժանորդագրվեք մեր ալիքին Telegram-ում
