Իրան-Հայաստան և Հնդկաստան-Հայաստան արտահանման ու ներմուծման ծավալները կրճատվել են. ԻՆՖՈԳՐԱՖԻԿԱ

Ըստ շրջանառվող լուրերի` Իրանի, Հայաստանի և Հնդկաստանի ներկայացուցիչները հանդիպելու են, որպեսզի քննարկեն Հնդկաստան-Իրան-Հայաստան տրանսպորտային ուղին։ Իրականում դա մեծ նշանակություն կունենա ՀՀ տնտեսության համար, քանի որ նոր շուկաներ և լայն հնարավորություններ կբացվեն տնտեսվարողների համար։

Հայաստանը փորձում է իր տարածքը հնարավորինս արդյունավետորեն օգտագործել տարածաշրջանում տեղի ունեցող գործընթացների համատեքստում։ Եվ այս ճանապարհին կարևոր է բոլոր հնարավոր տրանսպորտային ուղիների դիտարկումը։

Հատկապես հուսալի են Հայաստանի բարեկամ երկրների հետ տրանսպորտային հանգույցները։ Անկախությունից ի վեր` Հայաստանը գտնվել է խորը շրջափակման մեջ, որի պարագայում կարողացել է տպավորիչ տնտեսական աճեր արձանագրել։ Պատկերացնու՞մ եք`եթե ամբողջովին օգտագործվեն ՀՀ տրանսպորտային հնարավորությունները,  որքանով կարող է ավելանալ տնտեսական աճի ցուցանիշը։

Նկատենք, որ բավականին աշխույժ են  Հայաստան-Իրան-Հնդկաստան կապերը`հատկապես Իրան-Հայաստան և Հնդկաստան- Հայաստան առևտրի մասով։

Դիտարկենք 2024թ․ առաջին կիսամյակում  Իրան-Հայաստան և Հնդկաստան-Հայաստան արտահանման և ներմուծման ծավալները․

ՀՀ ՊԵԿ տվյալների համաձայն՝ Հայաստանի արտահանումը դեպի Իրան 2024թ․ առաջին կիսամյակում 2023թ նույն կիսամյակի համեմատ կրճատվել է 6%-ով՝ կազմելով մոտ ＄50 մլն, իսկ դեպի Հնդկաստան՝ 86%-ով՝ կազմելով մոտ ＄3 մլն։

Մյուս կողմից, Իրանից Հայաստան ներմուծման ծավալները կրճատվել են 7%-ով՝ կազմելով ＄270 մլն, իսկ Հնդկաստանից՝ 24%-ով՝ կազմելով մոտ ＄113 մլն։

Բեռնափոխադրող ընկերությունները` 1000 խոշոր հարկ վճարողների ցանկում. ԻՆՖՈԳՐԱՖԻԿԱ

Անշուշտ, փոխադարձ առևտրի ծավալների վերոնշյալ անկումները խանգարող հանգամանք չեն երկրների միջև առկա ջերմ հարաբերությունների համար։ Հուսանք, որ Հայաստան-Իրան-Հնդկաստան տրանսպորտային միջանցքն իրականություն կդառնա՝ չնայած Մերձավոր Արևելքում առկա բոլոր բացասական գործոններին։

Միջանցքի կայուն գործելու պարագայում, անշուշտ, օգուտներ կքաղի ոչ միայն Հայաստանը, այլև Իրանը և Հնդկաստանը։