Ռուսաստանի և Թուրքիայի միջև արդեն երկու տարի շարունակվող բանակցությունները վերջինիս տարածքում միջազգային գազային հանգույց ստեղծելու շուրջ, ըստ երևույթին, վերջապես տալիս են իրենց արդյունքը։ Այս մասին գրում է Sputnik Азербайджан-ը։
Այսպես, Թուրքիայի էներգետիկայի և բնական պաշարների նախարար Ալփարսլան Բայրաքթարը հայտնել է, որ հաջորդ տարի Ստամբուլում գազի առևտրի կենտրոն կստեղծվի՝ ռուսական «Գազպրոմի» և թուրքական «Բոտաշի» մասնակցությամբ։
Այսինքն, հաջորդ տարվանից Ռուսաստանը գազը կվաճառի Ստամբուլի գազի ինդեքսով։ Բայրաքթարը նշել է, որ Ստամբուլի գազի կենտրոնի համար ստեղծված ենթակառուցվածքը կառավարվելու է այս երկու ընկերությունների կողմից։
Թուրքիայի գազային կենտրոնի տեսլականը հիմնված է երկրում գազի ծավալների հավաքագրման սկզբունքի վրա գործընկեր պետություններից, որոնք իրենց «կապույտ վառելիքը» մատակարարում են եվրոպական շուկա:
Այսպիսով, Անկարան նաև առաջարկեց գազային հանգույցը միացնել Ադրբեջանին, որն այսօր իր ենթակառուցվածքների միջոցով թուրքական տարածքով շուրջ 12 միլիարդ խորանարդ մետր վառելիք է մատակարարում Եվրոպային։
Միաժամանակ գազային հանգույցին միանալու հրավեր է ստացել Իրանը, հեղուկ բնական գազը (LNG) մատակարարող երկրներ, ինչպիսիք են Կատարը, Ալժիրը և Նիգերիան, ինչպես նաև Թուրքմենստանը, որը ներկայումս նույնիսկ Թուրքիա արտահանելու ենթակառուցվածք չունի։
Լայնածավալ գազային հանգույց ստեղծելու համար Թուրքիան սկսել է համապատասխան օրենսդրական դաշտ և ենթակառուցվածքներ պատրաստել։ Այսպես, անցյալ տարի Թուրքիայի խորհրդարանը հավանություն է տվել նավթագազային պետական «Բոտաշ» ընկերության կառուցվածքում՝ հանգույցի նախագիծն իրականացնելու համար։
Բացի այդ, Թուրքիան ակտիվորեն պատրաստվում է գազի պահեստարաններ՝ տարբեր աղբյուրներից «կապույտ վառելիքի» ծավալներ ստանալու և որոշ ժամանակով պահպանելու համար։
Այսպիսով, թուրքական կառավարությունը նախատեսում է մինչև 2028 թվականը երկիրը դարձնել եվրոպական տարածաշրջանում գազի պահեստավորման հզորությամբ երրորդ երկիրը։
Բաժանորդագրվեք մեր ալիքին Telegram-ում
