Boeing-ը ստացել է մոտ 21 միլիարդ դոլար՝ իր բաժնետոմսերի ընդլայնված վաճառքից: Այս ընկերությանը անհրաժեշտ է իրացվելիություն՝ իր ֆինանսական դիրքն ամրապնդելու և վարկային վարկանիշի պոտենցիալ անկումը թույլ չտալու համար․ նշում է Bloomberg-ը:
Ընկերության բաժնետոմսերը տարեսկզբից նվազել են 42%-ով՝ Boeing 737 MAX ինքնաթիռների անվտանգության խստացված կարգավորող պահանջների և աշխատողների գործադուլի ֆոնին։
Օդանավ արտադրող ամերիկյան խոշոր ընկերությունը վաճառել է 112,5 միլիոն սովորական բաժնետոմս 143 դոլարով (16,09 միլիարդ դոլարով), իսկ ավանդային բաժնետոմսերը՝ 5 միլիարդ դոլարով:
Boeing-ի սովորական բաժնետոմսերը վաճառվում էին մոտ 7,7% զեղչով՝ մինչև ուրբաթ՝ հոկտեմբերի 25-ի փակման գինը (155,01 դոլար): Հոկտեմբերի 28-ին սակարկությունների փակման ժամանակ ընկերության բաժնետոմսերը մեկ բաժնետոմսի դիմաց վաճառվում էին 150,69 դոլարով՝ նախորդ փակման համեմատ կորցնելով 4,32 դոլար (մինուս 2,79%)։
Ընդհանուր առմամբ, Boeing-ի բաժնետոմսերն այս տարի նվազել են գրեթե 42%-ով, ինչը երկրորդ վատագույն ցուցանիշն է Dow Jones Industrial Average-ում․ նշում է Bloomberg-ը։
Boeing-ը նաև տեղաբաշխողներին հնարավորություն է տվել ձեռք բերել լրացուցիչ 16,875 միլիոն սովորական բաժնետոմս և 750 միլիոն դոլար ավանդային բաժնետոմսեր:
Սովորական բաժնետոմսերի առաջարկից զուտ հասույթը կկազմի մոտավորապես 15,81 միլիարդ դոլար, իսկ ավանդային բաժնետոմսերի առաջարկից՝ մոտավորապես 4,91 միլիարդ դոլար (ենթադրելով, որ տեղաբաշխողները չեն կիրառում օպցիոնը):
Boeing-ը մտադիր է օգտագործել զուտ հասույթը կորպորատիվ նպատակներով, ներառյալ պարտքի մարումը, շրջանառու կապիտալը, կապիտալ ծախսերը, ինչպես նաև ֆինանսավորումը և ներդրումները իր դուստր ձեռնարկություններում․ ասվում է ընկերության հայտարարության մեջ:
Հոկտեմբերի 23-ին ընկերությունը թույլտվություն ստացավ ԱՄՆ արժեթղթերի և բորսաների հանձնաժողովից՝ վաճառելու մինչև 25 միլիարդ դոլար արժողությամբ բաժնետոմսեր և պարտքեր:
Բաժանորդագրվեք մեր ալիքին Telegram-ում
