Այս մրցաշրջանում ըստ Forbes-ի ամենաբարձր վարձատրվող 10 ֆուտբոլիստները ընդհանուր առմամբ կվաստակեն 983 միլիոն դոլար, ինչը ռեկորդային է։ Սակայն դա ընդամենը 2%-ով է ավելի նախորդ տարվա համեմատ։
2024/25 մրցաշրջանի ամենաբարձր վարձատրվող ֆուտբոլիստների վարկանիշը երկրորդ անգամ անընդմեջ և 10 տարվա մեջ վեցերորդ անգամ գլխավորել է սաուդյան Ալ-Նասրի հարձակվող Կրիշտիանու Ռոնալդուն։
Սպասվում է, որ այս մրցաշրջանում պորտուգալացին կվաստակի 285 միլիոն դոլար, ինչը ռեկորդային եկամուտ կլինի ֆուտբոլում։ Բոլոր այն մարզիկներից, որոնց Forbes-ը հետևել է 1990 թվականից ի վեր, միայն բռնցքամարտիկ Ֆլոյդ Մեյվեզերը երբևէ գերազանցել է այդ տարեկան եկամուտը՝ մնալով ակտիվ մարզիկ: Անցյալ տարվա Forbes-ի ցուցակում Ռոնալդուն վաստակել է 260 միլիոն դոլար։
Ռոնալդուն 2024/25 մրցաշրջանում խաղադաշտից դուրս 65 միլիոն դոլար կվաստակի: Պորտուգալացու ավանդական գործընկերներից են Nike-ը, Herbalife-ը և Whoop-ը, որոնցում նա մասնաբաժին ունի: Ռոնալդուն ավելի վաղ հայտարարել էր իր սեփական շքեղ ժամացույցների հավաքածուի թողարկման մասին՝ Jacob & Co-ի հետ համատեղ: 2024 թվականի մայիսին պորտուգալացին չորրորդ անգամ ճանաչվեց աշխարհի ամենաբարձր վարձատրվող մարզիկը։
Վարկանիշի երկրորդ տեղը զբաղեցրել է ամերիկյան «Ինտեր Մայամիի» և Արգենտինայի հավաքականի հարձակվող Լիոնել Մեսսին։ Ակնկալվում է, որ այս մրցաշրջանում նա կվաստակի 135 միլիոն դոլար, որից 60 միլիոնը՝ ակումբից, ևս 75 միլիոնը՝ ոչ ֆուտբոլային գործունեությունից:
Խաղադաշտից դուրս արգենտինացին պարծենում է գործընկերների տպավորիչ ցուցակով, ներառյալ Adidas-ը, Apple TV-ն և Konami-ն: Անցյալ ամիս ֆուտբոլիստը նաև բացեց իր սեփական արտադրական ընկերությունը, որը կոչվում է 525 Rosario։ Այն Արգենտինայում իր հայրենի քաղաքի և իր ընտանիքի տան հասցեն է: Իսկ հոկտեմբերին Մեսսին հայտարարեց իր սեփական օծանելիքի շարքի մեկնարկի մասին՝ Messi Fragrances անունով:
Ցուցակում երրորդը սաուդյան Ալ-Հիլալ թիմի բրազիլացի հարձակվող Նեյմարն էր։ 2024-25 մրցաշրջանի համար նրա կանխատեսվող եկամուտը կկազմի 110 միլիոն դոլար (80 միլիոն դոլար խաղադաշտում + 30 միլիոն դոլար խաղադաշտից դուրս):
Հաջորդը ֆրանսիացի հարձակվող Կարիմ Բենզեման «Ալ-Իթիհադից» (104 միլիոն դոլար) և նրա հայրենակից Կիլիան Մբապեն («Ռեալ Մադրիդ», 90 միլիոն դոլար), նորվեգացի հարձակվող Էրլինգ Հալանդը (Մանչեսթեր Սիթի, 60 միլիոն դոլար), վարկանիշային դեբյուտանտ բրազիլացի Վինիսիուս Ժունիորը (Ռեալ Մադրիդ, 55 միլիոն դոլար), եգիպտացի հարձակվող Մոհամեդ Սալահը («Լիվերպուլ», 53 միլիոն դոլար), սենեգալցի հարձակվող Սադիո Մանեն (Ալ Նասր, 52 միլիոն դոլար) և բելգիացի կիսապաշտպան Կևին Դե Բրույնեն «Մանչեսթեր Սիթիից» (39 միլիոն դոլար):
Ընդհանուր առմամբ, այս մրցաշրջանում վարկանիշային աղյուսակի լավագույն 10 խաղացողները ընդհանուր առմամբ վաստակելու են ավելի քան 983 միլիոն դոլար, ինչը ռեկորդային է ցուցակի համար: Այդ գումարի հիմնական մասը բաժին կհասնի Սաուդյան Արաբիայի ակումբներում հանդես եկող ֆուտբոլիստներին։
Բաժանորդագրվեք մեր ալիքին Telegram-ում
