Աշխատուժի արտադրողականությունը Հայաստանում և նրա շուրջը. ԻՆՖՈԳՐԱՖԻԿԱ

Առանց աշխատանքի արտադրողականության բարձրացման` հնարավոր չէ սեղմ ժամկետներում ապահովել հասարակության լայն շերտերի բարեկեցության աճ։ Իսկ ինչպիսի՞ն է աշխատանքի արտադրողականությունը աշխարհի տարբեր անկյուններում։ Այս մասով Աշխատանքի միջազգային կազմակերպությունն ունի համապատասխան վիճակագրություն  2023թ․ կտրվածքով։

Աշխատանքի արտադրողականությունը չափվում է միջազգային դոլարով (Int$), հիպոթետիկ արժույթով, որն օգտագործվում է տարբեր երկրների գնողունակությունը համեմատելու համար՝ հաշվի առնելով գների տարբերությունները:

Աշխատանքի արտադրողականությունը ցույց է տալիս`1 ժամ աշխատելիս որքան ՀՆԱ է ստեղծվում։ Վերջինս արտահայտված է 2017թ․ հաստատուն գներով։

Վիճակագրական տվյալները փաստում են, որ ամենաբարձր արտադրողականությունը հաստատվել է Լյուքսեմբուրգում, որտեղ 1 ժ աշխատանքը ստեղծում է $146 ՀՆԱ։ Լյուքսեմբուրգում աշխատողների արտադրողականությունը գրեթե 3 անգամ ավելի բարձր է, քան Կատարում ՝ շնորհիվ երկրի ուժեղ ֆինանսական ծառայությունների ոլորտի, որն ապահովում է զգալի քանակությամբ արտադրություն համեմատաբար ավելի քիչ աշխատուժի ներգրավմամբ:

Ուսումնասիրենք պատկերը Հայաստանում և մեր շրջապատում․

Վիճակագրական տվյալները փաստում են, որ Հայաստանում և Վրաստանում աշխատանքի արտադրողականությունը կազմում է $21: Համեմատության համար նշենք, որ Լյուքսեմբուրգում արտադրողականությունը մոտ 7 անգամ գերազանցում է Հայաստանի և Վրաստանի արտադրողականության մակարդակներին։

Ադրբեջանում արտադրողականությունը կազմում է $16։ Ռուսաստանում և Ղազախստանում դիտվում է արտադրողականության $30 մակարդակ։

Այստեղ նկատենք, որ Հավաքական Արևմուտքին ձեռնոց նետած Ռուսաստանի ցուցանիշն էականորեն ցածր է Արևմուտքի համեմատ։

Արտադրողականության ամենացածր մակարդակը մեր կողմից բերված երկրների ցանկում դիտվել է Ղրղզստանի պարագայում՝ $7։