Հիմնանորոգվում է Գեղարքունիք և Լանջաղբյուր բնակավայրերի խմելու ջրագիծը․ որքա՞ն գումար է հատկացրել ՀՀ կառավարություն

Մեկնարկել են Գավառ համայնքի Գեղարքունիք և Լանջաղբյուր բնակավայրերի խմելու ջրագծի հիմնանորոգման աշխատանքները։ Այս մասին տեղեկանում ենք Գավառի համայնքապետարանի ֆեյսբուքյան էջից։

Գեղարքունիքի բնակավայրից շուրջ 17 կմ հեռավորության վրա գտնվող Սպիտակասարի ջրի ակունքի մոտ կառուցվում է ջրընդունիչ կապտաժ (աղբյուրաշենք), որից անցկացվելու է նոր խողովակաշար և միացվելու է գոյություն ունեցող ջրագծին։

Կապտաժը նաև ցանկապատվելու է։

Այժմ ընթանում են կապտաժի կառուցման և Սպիտակասարից դեպի բնակավայրեր խրամուղիների փորման աշխատանքները։

Խմելու ջրագիծը կառուցվում է 2024 թվականի սուբվենցիոն ծրագրերի շրջանակներում։

Արժեքը կազմում է 71 մլն 736 հազար ՀՀ դրամ, որի 75%-ն հատկացնում է ՀՀ կառավարությունը, 25%-ը՝ համայնքապետարանը։