Հայ-ռուսական ապրանքաշրջանառությունը 2022 թ․-ի 7 ամիսների ընթացքում աճել է գրեթե 50%-ով։ Այս մասին հայտարարել է ՌԴ փոխվարչապետ Ալեքսեյ Օվերչուկը՝ ելույթ ունենալով Երևանում ընթացող Ռուս-հայկական 9-րդ միջտարածաշրջանային համաժողովում։ Գրում է РИА Новости-ն։
Ըստ նրա՝ 2022 թ․-ի հունվար-հուլիսին Ռուսաստանի Դաշնության և Հայաստանի Հանրապետության միջև ապրանքաշրջանառությունը կազմել է 2 միլիարդ դոլար՝ 2021 թ․-ի նույն ցուցանիշի համեմատ աճելով գրեթե 50%-ով։ Նշված ժամանակահատվածում Ռուսաստանի արտահանումը Հայաստան կազմել է 1,4 մլրդ դոլար՝ ավելանալով 40,5%-ով, Հայաստանից Ռուսաստան ներմուծումն աճել է 66,3%-ով՝ կազմելով 0,6 մլրդ դոլար։
Փոխվարչապետը նաև հավելել է, որ երկու երկրներն էլ ակտիվորեն զարգացնում են ներդրումային համագործակցությունը։ Կուտակված ռուսական ներդրումների ընդհանուր ծավալը կազմում է Հայաստանի տնտեսությունում օտարերկրյա ներդրումների ընդհանուր ծավալի գրեթե 40%-ը՝ մոտ 2 մլրդ դոլար։
Օվերչուկը իր խոսքում հիշեցրեց, որ Հայաստանում գործում են ավելի քան 40 խոշոր ռուսական ընկերություններ։ Նրանցից մի քանիսը խոշոր հարկատուներն են, մասնավորապես՝ «Գազպրոմ Արմենիան», «ԳեոՊրոՄայնինգ Գոլդը», «ՄՏՍ Արմենիան», «Ռուսական երկաթուղիները», «Ռոսատոմը»։
Բաժանորդագրվեք մեր ալիքին Telegram-ում
