Բայդենի վարչակազմը հայտարարել է, որ ԱՄՆ տեխնոլոգիական ընկերություններին, որոնք կստանան դաշնային ֆինանսավորում, 10 տարով կարգելվի Չինաստանում «առաջադեմ տեխնոլոգիաների» օբյեկտներ կառուցել։ Գրում է BBC–ն։
Հայտարարությունը հրապարակվել է որպես 50 միլիարդ դոլար արժողությամբ ծրագրի մի մաս, որն ուղղված է տեղական կիսահաղորդչային արդյունաբերության զարգացմանը:
![](https://banksnews.am/wp-content/uploads/2024/05/converse-970x250-c360.webp)
Սա պայմանավորված է այն հանգամանքով, որ բիզնես խմբերը պահանջել են ավելի շատ պետական աջակցություն՝ նվազեցնելու համար կախվածությունը Չինաստանից:
ԱՄՆ առևտրի նախարար Ջինա Ռայմոնդոն նշել է, որ CHIPS-ի միջոցներ ստացողները չեն կարող վտանգի ենթարկել ազգային անվտանգությունը, հետևաբար՝ նրանց թույլ չի տրվի օգտագործել այս գումարը Չինաստանում ներդրումներ կատարելու համար՝ 10 տարի ժամկետով։ Նա հավելել է, որ գումար ստացող ընկերությունները Չինաստանում կարող են միայն ընդլայնել իրենց հանգույցների գործարանները՝ շուկան սպասարկելու համար:
Հիշեցնենք, որ օգոստոսին ԱՄՆ նախագահ Ջո Բայդենը ստորագրել էր օրենք, որով 280 մլրդ դոլար է հատկացվում բարձր տեխնոլոգիաների արտադրությանը և գիտական հետազոտություններին, քանի որ մտավախություններ կային, որ ԱՄՆ-ը կորցնում է իր տեխնոլոգիական առավելությունը Չինաստանի նկատմամբ:
Ներդրումները ներառում են հարկային արտոնություններ այն ընկերությունների համար, որոնք կառուցում են համակարգչային չիպերի արտադրության գործարաններ ԱՄՆ-ում: Ներկայումս ԱՄՆ-ն արտադրում է կիսահաղորդիչների համաշխարհային մատակարարման մոտավորապես 10%-ը: Իսկ նման կիսահաղորդիչները պահանջված են բոլոր ոլորտներում՝ մեքենաշինությունից մինչ բջջային հեռախոսների արտադրություն։
Այս ֆոնին, Վաշինգտոնում Չինաստանի դեսպանատունը դեմ էր արտահայտվել կիսահաղորդչային օրինագծին՝ այն անվանելով «սառը պատերազմի մտածելակերպ» հիշեցնող։
Բաժանորդագրվեք մեր ալիքին Telegram-ում