Երևանի գլխավոր հատակագծի մշակման աշխատանքներն ամփոփման փուլում են: Այս մասին զեկուցվել է Երևանի քաղաքապետարանի գործակարգավարական նիստում։
Արձագանքելով այդ աշխատանքների մասին զեկույցին՝ քաղաքապետ Տիգրան Ավինյանը նշել է, որ Երևանը որոշակի տրամաբանությամբ զարգանում է, իրականացվում է կառուցապատում, և մեխանիկորեն պետք է առանձնացվեն հողային միավորներ, որոնց նպատակը պետք է լինի այդ հատվածներում դպրոցներ ու մանկապարտեզներ կառուցելն՝ ըստ բնակչության թվի:
«Իրականում այս անկանոն կառուցապատումը բերել է նրան, որ շատ տեղերում ունենք ահռելի ծավալի բնակելի զանգված, և չունենք որևէ սոցիալական ենթակառուցվածք։ Նման խնդիրների առաջ ենք կանգնել, և որպեսզի դրանք չխորանան, պետք է առանձնացվեն հողակտորներ, որոնց վրա կկառուցենք մանկապարտեզներ ու դպրոցներ»,- ասել է նա։
