«Ֆիթչ» վարկանիշային գործակալության մեկնաբանմամբ սուվերեն վարկանիշի պահպանման հիմքում ընկած են մեկ շնչին ընկնող եկամտի, կառավարության և գործարար միջավայրի լավ ցուցանիշները՝ համեմատած համադրելի երկրների հետ, ինչպես նաև կայուն մակրոտնտեսական ու հարկաբյուջետային քաղաքականության շրջանակն ու բարեփոխումների վստահելի հանձնառությունը: Գործակալությունն առանձնացրել է նաև արտարժույթով արտահայտված պետական պարտքի բարձր տեսակարար կշիռը, համեմատաբար թույլ արտաքին դիրքն ու աշխարհաքաղաքական ռիսկերը: Հաղորդում է ՀՀ ֆինանսների նախարարությունը։
Գործակալության գնահատմամբ՝ թեև ռուս-ուկրաինական հակամարտությունը և Ռուսաստանի նկատմամբ կիրառվող աննախադեպ պատժամիջոցները բացասական հետևանքներ են թողնում համաշխարհային տնտեսության վրա, սակայն Հայաստանի տնտեսության վրա հետևանքները դրական են, քանի որ զբոսաշրջիկների, դրամական փոխանցումների ներհոսքերի և դեպի Ռուսաստան արտահանման բարձր աճի միտումներ են գրանցվում: Այս պայմաններում գործակալությունը բարձրացրել է 2022 թվականի տնտեսական աճի իր կանխատեսումները՝ սահմանելով 6.4 %:
Անդրադառնալով հետագա զարգացումներին՝ գործակալությունն ընդգծել է, որ վարկանիշի բարելավման վրա կազդեն կառավարության պարտք/ՀՆԱ հարաբերակցության կայուն նվազող դինամիկայի ապահովումը, արտաքին ֆինանսական ցուցանիշների բարելավումը, ինչպես նաև աշխարհաքաղաքական ռիսկերի նշանակալի ու տևական կրճատումը:
- Գովազդ -
