Այսօր կայացել է աշխատանք գտնելու և առաջարկելու առաջին մասշտաբային պետական հարթակի՝ https://e-work.am/-ի պաշտոնական շնորհանդեսը։
Հարթակը նպատակ ունի կամուրջ ստեղծել գործատուի և աշխատանք փնտրողի միջև, մեկտեղել հանրապետությունում առկա թափուր աշխատատեղերն ու խթանել պետություն-գործատու-աշխատանք փնտրող կապը։
![](https://banksnews.am/wp-content/uploads/2024/05/converse-970x250-c360.webp)
Միջոցառման ընթացքում ողջույնի խոսքով հանդես է եկել ՀՀ աշխատանքի և սոցիալական հարցերի նախարար Նարեկ Մկրտչյանը։ Ներկայացնելով աշխատանքի և զբաղվածության ոլորտում իրականացվող աշխատանքները՝ նախարարը կարևորել է նմանօրինակ հարթակների դերը, որոնք աշխատանք փնտրողներին հնարավորություն են տալիս գտնել իրենց մասնագիտությանը համապատասխան կայուն զբաղվածություն։
«Ըստ էության, սա առաջին մասշտաբային պետական հարթակն է, որը թվային տիրույթում նոր հնարավորություններ է առաջարկում աշխատանք փնտրողներին և գործատուներին։ Լիահույս եմ, որ այս գործում ևս կհաջողենք և արված աշխատանքն արդյունավետ կլինի և՛ աշխատանք փնտրողների, և՛ գործատուների համար։ Կցանկանամ նաև, որ e-work.am-ը դառնա այն իրական գործող հարթակը, որը քաղաքացիներին աշխատանք գտնելու հնարավորություն կտա, ինչին էլ ուղղված են մեր շարունակական ջանքերը»,- նշել է նախարարը։
Ողջույնի խոսքով հանդես է եկել նաև «Նորք» տեխնոլոգիաների կենտրոնի տնօրեն Անահիտ Պարզյանը:
«Շարունակելով Հայաստանի Հանրապետության սոցիալական պաշտպանության ոլորտի թվային փոխակերպումը՝ «Նորք» տեխնոլոգիաների կենտրոնը մշակել է զբաղվածության ոլորտի առաջին մասշտաբային պետական թվային հարթակը, որի հնարավորությունները ներկայացնում ենք այսօր։ Զբաղված լինելն ինքնանպատակ չէ. աշխատանքը պետք է լինի հաճելի, իսկ նպատակը՝ ստեղծած արժեքը՝ անհատի, պետության, աշխարհի համար։ Հենց այս գաղափարով ենք ստեղծել հարթակը և հուսով ենք՝ այն հնարավորություն կտա, որ այս գաղափարները լիարժեք իրականանան։ Նշեմ նաև, որ սա դեռևս մեկնարկն է, և այս պահից սկսած շարունակելու ենք աշխատել հարթակը էլ ավելի ֆունկցիոնալ և կիրառական դարձնելու ուղղությամբ»,- նշել է կենտրոնի տնօրենն ու հյուրերին ներկայացրել նոր հարթակի հնարավորություններն ու գործիքները։
Միջոցառման շրջանակում տեղի է ունեցել նաև պանելային քննարկում՝ «Զբաղվածության մարտահրավերները թվայնացման դարաշրջանում» թեմայով, որին բանախոսել են ԱՍՀ նախարարի տեղակալ Ռուբեն Սարգսյանը, ԿԳՄՍ նախարարի տեղակալ Արաքսիա Սվաջյանը, ԲՏԱ նախարարի առաջին տեղակալ Գևորգ Մանթաշյանը։ Քննարկումն անցկացրել է «Ամերիա» ընկերությունների խմբի գործընկեր և կառավարման խորհրդատվական ծառայության ղեկավար Տիգրան Ջրբաշյանը։
Շնորհանդեսից հետո կայացել է նաև «Աշխատանքի տոնավաճառ 2024»-ը, որին մասնակցել են մի շարք ոլորտների առաջատար գործատուներ։
«e-work.am» հարթակը հնարավորություն է տալիս աշխատանք փնտրողներին և գործատուներին հաղորդակցվել միմյանց և պետության հետ թվային միջավայրում, ստանալ և առաջարկել թվային ծառայություններ։ Անհատներին այս հարթակը կտա հնարավորություն բարելավել աշխատանքային պայմանները և կարիերայում գրանցել աճ։ Գրանցվելով հարթակում՝ անհատները կունենան սեփական էջ, որտեղ կտեղադրեն իրենց աշխատանքային փորձառության վերաբերյալ տեղեկատվություն, կկարողանան ստանալ աշխատանքի առաջարկներ և կունենան հնարավորություն ներգրավվելու զբաղվածության ծրագրերում։ Իսկ կազմակերպության ղեկավարները կկարողանան պետական միասնական հարթակում ստեղծել իրենց կազմակերպության պրոֆիլը և անվճար տեղադրել կազմակերպությունում առկա թափուր հաստիքների հայտարարությունները և գտնել համապատասխանող աշխատողներին, ինչպես նաև ծանոթանալ տարբեր ոլորտներում աշխատանք փնտրող անձանց ինքնակենսագրականներին։
Բաժանորդագրվեք մեր ալիքին Telegram-ում