Երևանում 2024 թվականին նախատեսվում է իրականացնել 55,3 կմ երկարությամբ միջին նորոգման աշխատանքներ:
Ըստ այդմ՝ Նոր Նորք վարչական շրջանում նախատեսվում է նորոգել 5,3 կմ ճանապարհ, Կենտրոն վարչական շրջանում՝ 10,3 կմ, Նորք-Մարաշում՝ 4,4 կմ, Էրեբունիում՝ 7,8 կմ, Նուբարաշենում՝ 2,3 կմ, Քանաքեռ-Զեյթունում՝ 3,1 կմ, Ավանում՝ 4,4 կմ, Շենգավիթում՝ 3,4 կմ, Աջափնյակում՝ 8,5 կմ, Դավթաշենում՝ 1,3, Արաբկիրում՝ 600 մետր, Մալաթիա-Սեբաստիայում՝ 3,9 կմ:
Այս մասին Երևանի քաղաքապետարանի գործակարգավարական խորհրդակցության ժամանակ զեկուցել է շինարարության և բարեկարգման վարչության պետի պարտականությունները կատարող Տիգրան Գեղամյանը:
Ինչո՞ւ կայացած չեն երկրորդային փողոցների փոսալցման մրցույթները. Ավինյան
Երևանի քաղաքապետ Տիգրան Ավինյանը հետաքրքրվել է, թե ինչու են ձգձգվել երկրորդային փողոցների փոսալցման աշխատանքները:
Քաղաքապետի տեղակալ Լևոն Հովհաննիսյանը տեղեկացրել է, որ փոսալցման աշխատանքները մեկնարկել են անցած շաբաթվանից, ընթացքը գնահատվում է բավարար, և որ աշխատանքների մի մասը իրականացվում է գիշերային ժամերին:
«Կապալառուների հետ ունենք պայմանավորվածություն, որ պետք է 24 ժամվա ընթացքում բոլոր քանդած փոսերը մեր կապալառուները կարողանան հասցնել ասֆալտապատել, որպեսզի հնարավորինս քիչ անհանգստություն պատճառենք մեր քաղաքացիներին»,- ասել է Լևոն Հովհաննիսյանը:
