Ինձ հետաքրքիր է՝ ինչն է պատճառը, որ վարչական շրջանների երկրորդային փողոցների փոսալցման մրցույթները ձգձգվել են:
Այս մասին այսօր Երևանի քաղաքապետարանի գործակարգավարական խորհրդակցության ժամանակ ասել է քաղաքապետ Տիգրան Ավինյանը:
Պատասխանելով՝ քաղաքապետի տեղական Լևով Հովհաննիսյանը նշեց, որ առաջնային փողցների մասով փոսալցման աշխատանքները մեկնարկել են նախորդ չորեքշաբթի օրվանից:
«Ընթացքը գնահատում ենք բավարար, ակտիվ կերպով ընթանում է, մասնավորապես` Կենտրոն, Արաբկիր և Նոր Նորք վարչական շրջաններում։ Ակտիվ երթևեկության պատճառով աշխատանքները հիմնականում գիշերային ժամերի են լինում», — նշել է նա:
Նրա խոսքով՝ կապալառուների հետ կա պայմանավորվածություն բոլոր քանդված փոսերը 24 ժամվա ընթացքում ասվալտապատելու վերաբերյալ:
Հովհաննիսյանի խոսքով՝ մյուս վարչական շրջաններում, բացի Աջափնյակ և Դավթաշեն վարչական շրջաններից, աշխատանքները ևս մեկնարկել են, իսկ վերոնշյալ վարչական շրջաններում, ըստ պայմանավորվածության, կմեկնարկեն այսօր:
«Ինչ վերաբերում է վարչական շրջանների մրցույթներին, ապա վերջերս մոնիթորինգ ենք արել, և ոչ բոլոր վարչական շրջանների մոտ է դեռ մրցույթների հայտը գնման վարչություն տեղափոխված: Դա, ինչպես ես եմ հասկացել, կապված է եղել որոշակի ստանդարտ մոտեցման մշակման հետ», — նշել է նա:
Արձագանքելով՝ Տիգրան Ավինյանը նշել է, որ ստանդարտների մշակման ժամկետն այնուամենայնիվ այն ժամանակահատվածը չէ, երբ աշխատանքները պետք է սկսվեն:
«Աշխատանքներն այս տարի պետք է պահվեն, և միգուցե հետո քննարկենք ստանդարտները: Հիմա փաստացի քանի՞ վարչական շրջան չունի երկրորդային փողոցներում իր կայացած փոսալցման մրցույթերը», — հարց ուղղել է քաղաքապետը:
Նա հորդորել է փոսալցման ստանդարտներին վերանայմանը անդրադառնալ մյուս տարվա աշխատանքներից առաջ, որպեսզի այս տարի աշխատանքները չկանգնեն։
«Կարծում եմ՝ ինչ անում ենք, ինչ փոփոխություն ուզում ենք անել, պետք է արվի ընթացիկ տարվա պրոցեսները չխանգարելու տրամաբանությամբ», — հավելել է նա:
