2024 թվականի պետբյուջեով կապիտալ ծրագրի համար նախատեսված և օբյեկտներով չբաշխված գումարներից կկատարվի վերաբաշխում 638 միլիոն 444 հազար գումարի չափով, որը կուղղվի մանկապարտեզների և մարզադպրոցների, ինչպես նաև վորքաութ տեսակի մարզահրապարակների նախագծմանն ու կառուցմանը:
Այս որոշման նախագիծը կառավարության նիստին ներկայացրել է ԿԳՄՍ նախարար Ժաննա Անդրեասյանը:
Ըստ նախարարի՝ 500 մանկապարտեզների կառուցման, վերակառուցման, հիմնանորոգման ծրագրի շրջանակում ընտրվել են 450 հաստատություններ, որոնցից 139-ում ավարտվել են շինարարական աշխատանքները, ընտրված մանկապարտեզներից 12-ի շինարարությունը նախատեսված է իրականացնել Հայաստանի տարածքային զարգացման հիմնադրամի պատվիրատվությամբ և Համաշխարհային բանկի աջակցությամբ:
«Հինգ մանկապարտեզների մասով վարկային միջոցները լրացնելու կարիք ունենք, այսինքն՝ պետական բյուջեից հավելյալ հատկացումների, և այդ ֆինանսավորումն ենք, ըստ էության, ապահովում, ինչպես նաև ապահովում ենք երկու մարզադպրոցների կառուցումը: Այսպիսով, նախագծով 461,4 միլիոն դրամ գումար է հատկացվում 5 մանկապարտեզների համար, որոնցից 3-ը նախագծման աշխատանքներ են, մյուսը՝ կառուցման, մյուսը՝ վերակառուցման»,- ասել է նախարարը:
173.6 միլիոն դրամ կհատկացվի 2 մարզադպրոցների համար, որոնք կկառուցվեն Արմավիրի մարզում: 10 վորքաութ տեսակի մարզահրապարակների համար կհատկացվի 4.6 միլիոն դրամ: Մարզահրապարակները կկառուցվեն Գեղարքունիքի, Տավուշի, Վայոց ձորի և Սյունիքի մարզերում, իսկ ավելի կոնկրետ՝ Ճամբարակ, Բերդ, Ջերմուկ, Կապան քաղաքներում:
ՀՀ վարչապետ Նիկոլ Փաշինյանը կարևորեց վորքաութ տեսակի մարզաձևը՝ ընդգծելով, որ այն աշխարհում ավելի ու ավելի պոպուլյար է դառնում:
«Մեր վերլուծությունները ցույց են տալիս, որ նաև փողոցներում նման ենթակառուցվածքների գոյությունը լավ միջոց է պատանիներին, երիտասարդներին քրեածին հակումներից, դրսևորումներից հետ պահելու և նրանց էներգիան այլ ուղղությամբ զարգացնելու համար»,- ասել է վարչապետը, ապա ընդգծել, որ մեխանիզմներ է պետք ստեղծել, որպեսզի մարդիկ դա օգտագործեն, ուստի նաև Վորքաութի ֆեդերացիան այստեղ անելիք ունի:
ԱԽ քարտուղար Արմեն Գրիգորյանը տեղեկացրել է, որ ենթակառուցվածքները ստեղծելուց հետո ֆեդերացիան պատրաստ է սկսել աշխատանքները, որպեսզի երիտասարդներին և շահագրգիռ քաղաքացիներին ներգրավեն:
«Մրցույթների պլաններ էլ կան, մենք կարծում ենք՝ այդ մրցույթներն ավելի կտարածվեն: Լավ նորություններից մեկն էլ այն է, որ ֆեդերացիան հաջողության պատմություն ունի, Հայաստանում որոշակի չափով տարածել են բայց ենթակառուցվածքների բացակայությունը որոշակի խոչընդոտներ է ստեղծել: Ենթակառուցվածքների ստեղծումը հնարավորություն կտա ավելի մեծ թափով և ավելի լայն շրջանակներ ներգրավել գործընթացի մեջ»,- ասել է նա:
