Կառավարությունը 1 տարի ժամանակով՝ մինչև 2025թ. դեկտեմբերի 31-ը, երկարաձգել է Հայաստանի սահմանամերձ բնակավայրերում ընտանիքների բնակարանային մատչելիության ապահովման պետական ծրագիրը։
Որոշումն ընդունվել է ՀՀ կառավարության նիստում։
Աշխատանքի և սոցիալական հարցերի նախարար Նարեկ Մկրտչյանի խոսքով՝ 2022 թվականին մեկնարկած ծրագրով շուրջ 2000 շահառուի պետք է տրամադրվի վարկերի տոկոսների համար սուբսիդավորում։
Նարեկ Մկրտչյանը նշել է, որ գործընկեր 4 բանկից արդեն իսկ ստացվել է 412 շահառուի հայտ, որոնք բաշխված են ըստ մարզերի՝ Տավուշում 239, Սյունիքում՝ 54, Արարատում՝ 50, Վայոց ձորում՝ 47, Գեղարքունիքում 22։ Բանկերից մինչ այս պահը տրամադրվել է 1.5 մլրդ դրամի վարկ։
«Շատ քաղաքացիներ էլ շինթույլտվությունները ստացել են, սակայն դեռ չեն դիմել բանկ, սակայն առաջիկա օրերին պատրաստվում են դա անել»,– տեղեկացրել է Մկրտչյանը։
Այս համատեքստում վարչապետ Նիկոլ Փաշինյանը հիշեցրել է, որ 2022թ. հոկտեմբերին այս որոշման ընդունումից հետո ամեն ամիս կառավարության նիստում հետաքրքրվում էին, թե քանի շահառու կա, պարզվում էր՝ չկա:
«Հիմա 412 շահառու ունենք։ Այսինքն, 412 վարկ բանկի կողմից հաստատված է։ Ընդ որում, տների մի մասը շինարարության մեջ է։ Նոր մտքով հաշվեցի՝ այս թիվը նշանակում է, որ ընդունման պահից, միջին վիճակագրականով, օրը մի տան վարկի հարց ենք լուծել։ Եվ սա, կարծում եմ, վատ ցուցանիշ չէ»,- նշել է նա։
Ծրագրով նախատեսվում է, որ վարկը տալիս է բանկը, բայց և՛ մայր գումարը, և՛ տոկոսը վճարում է կառավարությունը։
Բաժանորդագրվեք մեր ալիքին Telegram-ում
