Ըստ նրա՝ ընկերությունը գտնվում է Լոռու մարզում, երկար տարիներ օդանավակայանը չի շահագործվել, թռիչքներ չի իրականացրել: Ընկերության գույքը կազմում է 61.7 հեկտար հողատարածք, օդանավակայանի շենքերի մեծ մասն ամբողջությամբ քանդված են:
«Կազմակերպության գույքը Կառավարության որոշմամբ ամրացվել է ՊՆ-ին, և առաջարկում ենք կազմակերպությունը՝ ՓԲԸ-ն, հանել մասնավորեցման ծրագրից»,- ասել է Առնակ Ավետիսյանը:
«Քաղաքացիական պայմանագիր» խմբակցության պատգամավոր Սերգեյ Բագրատյանը հետաքրքրվել է՝ տարածքի նպատակային օգտագործման ծրագիր կա՞:
Առնակ Ավետիսյանը պարզաբանել է, որ գույքը ՊՆ-ին փոխանցելու Կառավարության որոշումն արդեն իսկ կայացվել է, գույքը հանվել է կազմակերպության հաշվեկշռից և դարձել պետական սեփականություն, և այժմ նպատակ կա այն օգտագործել ԶՈՒ-ի կարիքների համար:
«Դրանից ավելին բացելու հնարավորություն չունենք, որովհետև խոսքը ԶՈՒ կարիքների մասին է, և հնարավոր է՝ ստրատեգիական նշանակությամբ օգտագործվի»,- ասել է Ավետիսյանը:
Հարակից զեկուցող Արփի Դավոյանը նշել է, որ երբ մասնավորեցման ցանկից օդանավակայանը հանվի, այնտեղ ներդրումներ պետք է արվեն, քանի որ այն ռազմավարական նշանակություն ունի և պետք է շատ կարևոր դերակատարում ունենա:
«Որպես Լոռու մարզի ներկայացուցիչ՝ շատ ուրախ եմ սրա համար, որովհետև մեր տարածաշրջանում շատ դրական է գնահատվել այս նախագծի ի հայտ գալը, և օդանավակայանը մասնավորեցման ծրագրից հանելը»,- ասել է նա և հիշեցրել, որ օդանավակայանն «ավերվել է» 2006 թվականից:
