Ինտենսիվ այգիների ծրագրերի մասով կա քրեական վարույթ։ Այս մասին ճեպազրույցում ասել է Էկոնոմիկայի նախարարի տեղակալ Արման Խոջոյանը։
Փոխնախարարի խոսքով՝ իրենք նկատել են, որ ինտենսիվ այգիների ծրագրերի հետ կապված որոշ մարդիկ կեղծում են փաստաթղթերը և նախարարություն են ներկայացնում ուռճացված ծախսեր։
«Մենք բարձրաձայնել ենք, որ շահառուները կեղծել են փաստաթղթերը, դա իրավապահների գործն է։ Կարծում ենք, որ իրավապահները պատշաճ կերպով ուսումնասիրությունները կներկայացնեն»,- ասել է փոխնախարարը։
Նրա տեղեկացմամբ՝ իր աշխատասենյակում խուզարկություններ չեն արվել, ինքն էլ չի հարցաքննվել։
Էկոնոմիկայի նախկին փոխնախարար Անի Իսպիրյանը 2 ամիս ժամկետով տնային կալանքի է ենթարկվել։
Ավելի վաղ հաղորդվել էր, որ ՀՀ քննչական կոմիտեի և ՀՀ ԱԱԾ աշխատակիցների կողմից համատեղ իրականացված օպերատիվ-քննչական միջոցառումների, ՀՀ էկոնոմիկայի նախարարությունում և մի շարք անձանց բնակարաններում խուզարկությունների արդյունքում ձերբակալվել է 6 անձ: Նրանց թվում է եղել նաև Անի Իսպիրյանը։
Բաժանորդագրվեք մեր ալիքին Telegram-ում
