Երևանի 9 գետնանցումներում և Թաիրովի փողոցից Հաղթանակի կամուրջ տանող ճանապարհին վերելակների տեղադրումն ընթացքի մեջ է:
Փակ շուկայի և Կամոյի դպրոցի հարևանությամբ վերելակներն արդեն իսկ տեղադրված են: Վերջինս փորձարկված է և մոտ օրերս կհանձնվի շահագործման: Այս մասին Երևանի գործակարգավարական խորհրդակցության ժամանակ հայտարարել է Երևանի քաղաքապետարանի շինարարության և բարեկարգման վարչության պետի պաշտոնակատար Տիգրան Գեղամյանը:
«Այսօր սկսվում են Փակ շուկայի հարևանությամբ գտնվող գետնանցումում վերելակների տեղադրման աշխատանքները: Միաժամանակ հայտնում եմ, որ վերելակներ տեղադրելու նախապատրաստական աշխատանքներ են ընթանում հետևյալ հասցեներում՝ Կիլիկիա ավտոկայանի հարևանությամբ գտնվող գետնանցում, Գարեգին Նժդեհի փողոց՝ վարչական շենքի, ադմինիստրատիվ շենքի հարևանությամբ գտնվող գետնանցում, և «Հաղթանակ» զբոսայգու հարևանությամբ գտնվող գետնանցում»,- ասել է Գեղամյանը:
Երևանի քաղաքապետ Տիգրան Ավինյանը հետաքրքրվել է՝ տեղադրվածներն աշխատո՞ւմ են, Գեղամյանն ասաց, որ Փակ շուկայի հարևանությամբ եղել են մի քանի անգամ անսարքություններ, որոնք 1 օրվա կտրվածքով վերականգնվել են:
«Դեպք է եղել, որ ֆիզիկապես վնասել են, դեպք է եղել՝ ոչ ճիշտ օգտագործման կանոններով օգտագործելուց կանգնել է վերելակը, բայց շտկել են արդեն»,- ասել է Գեղամյանը:
Նա նաև տեղեկացրել է, որ տեղադրվել են նաև տեսահսկման սարքեր, որոնք սպասարկող ընկերության տրամադրության տակ են:
Ավինյանն առաջարկել է երկարաժամկետ լուծում գտնել, որպեսզի սպասարկման ժամկետն անցնելուց հետո վերելակները կրկին սպասարկվեն:
«Մինիմալ լուծումը, կարծում եմ, այն է, որ մենք ուղղակի պատվիրակենք որևէ մեկին ծառայություն մատուցել մեզ, տեսանկարահանող սարքավորումներ դնել և պատասխանատվությունը դնել այդ ընկերության վրա: Դա, կարծում եմ, ամենամատչելի տարբերակը կլինի»,- ասել է Ավինյանը:
