Հունվարի առաջին 18 օրվա ընթացքում շտապ բուժօգնության ծառայության կողմից իրականացվել է 19595 կանչ, որը նախորդ տարվա համեմատությամբ 2423 կանչով կամ 14 տոկոսով ավելի է:
Այս մասին Երևանի քաղաքապետարանի գործակարգավարական խորհրդակցության ժամանակ ասել է առողջապահության վարչության պետի պաշտոնակատար Դավիթ Կարապետյանը:
Նա տեղեկացրել է, որ կանչերը 11 տոկոսով ավելացել էին դեռ 2023 թվականի դեկտեմբերին: Կանչերի ընդհանուր թիվը դեկտեմբերին եղել է 26 854:
Դավիթ Կարապետյանը անդրադարձել է նաև շտապօգնության չափորոշիչները հաստատելու մասին հարցին: Ըստ նրա՝ յուրաքանչյուր 20 հազար բնակչին շտապօգնության 1 շարժակազմ է հասնում: Պաշտոնական տվյալների համաձայն՝ Երևան քաղաքի բնակչության՝ 1 միլիոն 75 հազարի պարագայում, արդեն իսկ 53-55 շարժակազմ է պետք, ուստի դիմել են ՀՀ առողջապահության նախարարին՝ շարժակազմերի թիվն ավելացնելու ակնկալիքով:
«Առաջիկայում նախատեսում ենք ծառայություն մատուցել նաև մոպեդներով: Իհարկե, այստեղ աշխատանք ունենք անելու և համապատասխան մասնագետներ գտնելու, որոնք կունենան համապատասխան կրթություն և վարեն մոպեդ, ինչպես նաև չափորոշիչները փոխելու: Նրանք ծառայություն կմատուցեն ոչ հիվանդանոցային պայմաններում բուժման իրականացում պահանջող դեպքերին, այլ միայն առաջին բուժօգնության սահմաններում»,- ասել է նա:
Դավիթ Կարապետյանը տեղեկացրել է, որ կատարվել է նաև ուշացումների մասին վերլուծություն: Ըստ այդմ՝ հունվարի առաջին 18 օրվա ընթացքում 19 595 կանչից 1 829 ուշացում է եղել, այն է՝ ուշացման դեպքերը 9.5 տոկոս են կազմում, իսկ Երևանի զանգերի սպասարկման և աջակցման բաժնում եղել է 6 բողոք, որոնցից 4-ը եղել են ուշացումների հետ կապված: Դեկտեմբերին ուշացումների թիվը կազմել է 4.5 տոկոս, եղել է 5 բողոք, որոնք ընդհանուր ուշացումների հետ կապված չեն եղել:
Դավիթ Կարապետյանը նաև նշել է, որ գոյություն ունեն կանչերի մի քանի տեսակներ: Կան կանչեր, որոնք անհետաձգելի բուժօգնություն և սպասարկում են պահանջում, երբ բուժառուի կյանքին ակնհայտորեն վտանգ է սպառնում, նման դեպքերում ժամանումը պետք է լինի առավելագույնը 20 րոպեում, իսկ կան դեպքեր, երբ բուժառուի ջերմությունը բարձր է, ուստի բուժանձնակազմի ժամանումը կարող է լինել մինչև 60 րոպեի ընթացքում, քանի որ եթե ընթացքում շտապ կանչեր լինեն, անձնակազմը ստիպված կլինի նախ սպասարկել դրանք, ապա՝ մյուսները:
Ամենաշատ կանչերը գրանցվում են 18:00-19:00-ն ընկած ժամանակահատվածում, կանչերի շեշտակի աճ է նկատվում երեկոյան 21:00-23:00-ն, այդ ժամերին է, որ բուժօգնության անձնակազմը կարող է ուշանալ, քանի որ չի հասցնում սպասարկել կանչերը:
Երևանի քաղաքապետ Տիգրան Ավինյանն էլ արձագանքել է, որ պետք է էականորեն բարելավել 1-03 զանգերի ծառայության որակը.
«Ինձ համար տարօրինակ է, որ որևէ մեկը կարող է զանգահարել 1-03 և պատասխան չստանալ, ինձ թվում է՝ նորմալ չէ։ Օրինակ, եթե 1-05-ով զանգահարում են քաղաքապետարան, չպատասխանելու դեպքում վատագույն դեպքում 15-20 րոպե քաղաքապետարանից հետ են զանգում այդ մարդուն, բայց 1-03-ի դեպքում այդ տրամաբանությունը չի կարող գործել: 1-03 դեպքում պարտադիր պետք է պատասխանել։ Մենք պետք է մարդկանց զանգերին 100% պատասխան ապահովենք»,– նշել է նա։ :
Նա ասել է, որ եթե պետք է, մոպեդներ ու հավելյալ մեքենաներ ձեռք կբերեն խնդիրը լուծելու համար:
Բաժանորդագրվեք մեր ալիքին Telegram-ում
