Նավթ արտահանող երկրների կազմակերպության (ՕՊԵԿ) գլխավոր քարտուղար, Քուվեյթի ներկայացուցիչ Հայթամ ալ-Գայսը Bloomberg-ին տված հարցազրույցում առաջարկել է իրանական նավթը վերադարձնել համաշխարհային շուկա։ Կազմակերպության ղեկավարն ասել է, որ համաշխարհային արտահանողները շահագրգռված են իրանական նավթի պաշտոնական մատակարարումների վերականգնմամբ, այն չի խախտի վառելիքի հավասարակշռությունը համաշխարհային շուկայում։
«Կարծում եմ՝ բուն Իրանի, ՕՊԵԿ-ի և շուկայի մասնակիցների ավելի լայն շրջանակի շահերից է բխում, որ իրանական նավթի յուրաքանչյուր բարելի վերադարձը աստիճանաբար լինի։ Այսպիսով, դա չի կարողանա ազդել հավասարակշռության վրա»,- ասել է Հայթամ ալ-Գայսը:
ՕՊԵԿ-ի գլխավոր քարտուղարը հավելել է, որ նավթի համաշխարհային արտադրողները լավատեսորեն են տրամադրված վառելիքի պահանջարկի ակնկալվող աճին, իսկ Իրանը ՕՊԵԿ-ի առանցքային և հիմնարար անդամն է և նավթի կարևոր մատակարար։
Թեհրանը տվյալներ չի հրապարակում նավթի արդյունահանման ու արտահանման վերաբերյալ, քանի որ գտնվում է ԱՄՆ պատժամիջոցների տակ։ Վերլուծաբանները կարծում են, որ երկիրը օրական վաճառում է մինչև մեկ միլիոն բարել։
Հիշեցնենք, որ 2018 թվականին՝ Դոնալդ Թրամփի նախագահության օրոք, ԱՄՆ-ն Իրանի նկատմամբ սահմանեց պատմության մեջ ամենածավալուն պատժամիջոցները, որոնքց տակ է ընկել նավթի արտահանումը, ինչպես նաև ավելի քան 700 բանկեր, ընկերություններ և անհատներ։