Տարեվերջին ձկնաբուծարանների գործունեության նոր կարգի ներդրումը ձկնաբույծների մոտ դժգոհության ալիք էր բարձրացրել: Ըստ ձկնաբույծների՝ նոր օրենքը չի նպաստելու ոլորտի զարգացմանը, այլ, ընդհակառակը, կրճատվելու են որսի ծավալները, ինչն էլ իր հերթին բերելու է արտահանման ծավալների նվազմանը։
Մյուս կողմից, վարչապետ Ն․ Փաշինյանի համոզմամբ՝ ձկնաբուծարանների գործունեության արդյունքում ջրի ծախսը արդյունավետ չէ և որ Հայաստանը կարող է ձուկ ներմուծել, մինչդեռ ջրի պարագայում դա հնարավոր չէ։ Իսկ ջրի պակասը լուրջ խնդիրներ կստեղծի ազգային անվտանգության համար։
![](https://banksnews.am/wp-content/uploads/2024/05/converse-970x250-c360.webp)
Ձկնաբուծարանների ներկայացուցիչներն էլ իրենց հերթին ընդգծել էին, որ ջրի կորուստների պատճառները բազմաթիվ են՝ կոչ անելով կառավարությանը առաջնահերթ զբաղվել հենց այդ խնդիրների լուծմամբ:
Երկու կողմն էլ թերևս ճիշտ են, իսկ այն, որ հանրապետությունում ջրի խնայողությունն անհրաժեշտություն է, կասկածից վեր է։ Ինչևէ, շարունակելով թեման՝ ներկայացնենք, թե 2023թ-ի առաջին, երկրորդ և երրորդ եռամսյակններում որքան ձուկ է արտադրվել, ինչպիսի ներմուծման և արտահանման ծավալներ ենք ունեցել․
Վիճակագրական տվյալները փաստում են, որ 2023թ-ի 1-ին եռամսյակում արտադրվել է 7,839 տոննա ձուկ։
2023թ-ի երրորդ եռամսյակում առաջին եռամսյակի համեմատ արտադրության ծավալները նվազել են 40%-ով՝ կազմելով 4,725 տոննա։
2023թ-ի առաջին եռամսյակում արտահանվել է 590 տոննա ձուկ։ 2023թ-ի երրորդ եռամսյակում առաջին եռամսյակի համեմատ ձկան արտահանման ծավալները նվազել են 30%-ով՝ կազմելով 411 տոննա։
Հայաստան 2023թ-ի առաջին եռամսյակում ներմուծվել է 1,755 տոննա ձուկ։ 2023թ-ի երրորդ եռամսյակում առաջին եռամսյակի համեմատ ձկան ներմուծման ծավալներն աճել են 31%-ով՝ կազմելով 2,299 տոննա։
Բաժանորդագրվեք մեր ալիքին Telegram-ում