Ազգային ժողովի՝ դեկտեմբերի 11-ի նիստի ժամանակ քվեարկության դրվեցին և ընդունվեցին առաջին և երկրորդ ընթերցմամբ քննարկվող օրենքների նախագծերը:
Երկրորդ ընթերցմամբ և ամբողջությամբ ընդունված նախագծերի թվում էին Կառավարության կողմից ներկայացված՝ «Նոտարիատի մասին» օրենքում փոփոխություններ և լրացումներ կատարելու մասին և «Հյուպատոսական ծառայության մասին» օրենքում փոփոխություններ կատարելու մասին օրենքների նախագծերի փաթեթը երկրորդ ընթերցմամբ և ամբողջությամբ ընդունելու մասին հարցը:
![](https://banksnews.am/wp-content/uploads/2024/05/converse-970x250-c360.webp)
Ազգային ժողովը 95 կողմ ձայնով վավերացրեց նաև «Հայաստանի Հանրապետության կառավարության և Հնդկաստանի Հանրապետության կառավարության միջև մաքսային հարցերով համագործակցության և փոխադարձ օգնության մասին» համաձայնագիրը։
Փաստաթղթով նախատեսվում են մաքսային հարցերում փոխադարձ վարչական օգնության ցուցաբերում և այդ նպատակով տեղեկատվության փոխանակում:
Համաձայնագրի կիրառումը կարևոր կլինի նաև հետբացթողումային հսկողության շրջանակում իրականացվող հարցումների իրավական հիմքերն ապահովելու համար:
«Համաձայնագրի կիրառմամբ կհաստատվի ուղղակի կապ երկու երկրների համապատասխան ստորաբաժանումների միջև, ինչն էլ իր դրական ազդեցություն կունենա Հնդկաստանից ՀՀ ներմուծման և ՀՀ-ից Հնդկաստան արտահանման ժամանակ մաքսային կանոնների խախտման դեպքերի բացահայտման, առկա խնդիրների առավել արագ և օպերատիվ լուծումների վրա»,- ասել էր ՀՀ պետական եկամուտների կոմիտեի նախագահի տեղակալ Աշոտ Մուրադյանը:
Քվեարկության դրվեց և երկրորդ ընթերցմամբ ու ամբողջությամբ ընդունվեց «Ազգային անվտանգության մարմինների մասին» օրենքում փոփոխություն և լրացումներ կատարելու մասին օրենքի նախագիծը երկրորդ ընթերցմամբ ընդունելու մասին հարցը:
Քվեարկության դրվեցին և ընդունվեցին «Սնանկության մասին» օրենքում փոփոխություններ և լրացումներ կատարելու մասին օրենքի նախագիծն առաջին ընթերցմամբ ընդունելու մասին հարցը, Հայաստանի Հանրապետության քրեական օրենսգրքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու մասին հարցը:
Քվեարկության դրվեց նաև Կառավարության ներկայացրած՝ «Զբոսաշրջության մասին» և կից ներկայացված օրենքների նախագծերի փաթեթն ընդունելու մասին հարցը, որն ընդունվեց առաջին ընթերցմամբ:
Ընդունված նախագծերի թվում էր նաև «Պետական տուրքի մասին» օրենքում լրացումներ և փոփոխություններ կատարելու մասին օրենքի նախագիծն առաջին ընթերցմամբ ընդունելու մասին հարցը, «Պետական գույքի կառավարման մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը առաջին ընթերցմամբ ընդունելու մասին հարցը, «Պրոբացիայի ծառայության մասին» և կից ներկայացված օրենքների նախագծերի փաթեթն առաջին ընթերցմամբ ընդունելու մասին հարցը, պատգամավոր Վիլեն Գաբրիելյանի ներկայացրած՝ «Զենքի շրջանառության կարգավորման մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու մասին հարցը և մի շարք այլ նախագծեր:
Ըստ այդմ՝ զենք ստանալու համար անհրաժեշտ կլինի նաև հանձնել տեսական ու գործնական քննություններ, դրանք կարող են իրականացնել ոլորտային մասնագիտացած կազմակերպությունները, արդյունքում՝ անձը կարող է հայտն ուղարկել Ոստիկանություն՝ ստանալու զենք կրելու թույլտվություն:
Նպատակ կա նախագծերի փաթեթի ընդունմամբ նպաստել նաև որսորդության, սիրողական ու սպորտային հրաձգության և ռազմամարզության զարգացմանը:
Բաժանորդագրվեք մեր ալիքին Telegram-ում