Ո՞ւմ գումարներով է Հայաստանում թափ առնում շինարարությունը․ միջազգային վարկերի միջոցներով կատարված շինարարությունը նվազել է

Հայաստանում այս տարվա հունվար-հոկտեմբեր ամիսներին 418 մլրդ 243 մլն դրամի շինարարություն է արվել։ Այս մասին Banksnews.am-ը տեղեկանում է ՀՀ Վիճակագրական կոմիտեի հրապարակած տվյալներից։

Դրա 21,8 %-ը՝ 91 մլրդ 403.4 դրամի, պետության հաշվին է եղել, 16,9 %-ը՝ 70 մլրդ 456.6 մլն դրամի, բնակչության միջոցների, իսկ 5,6 %-ը միջազգային վարկերի միջոցների հաշվին։

Թեև այս տարվա հունվար-հոկտեմբեր ամիսներին Հայաստանում միջազգային վարկերի միջոցներով կատարված շինարարությունը կազմել է 23 մլրդ 521.3 մլն դրամ, այնուամենայնիվ, սա նախորդ տարվա նույն ժամանակահատվածի համեմատ պակաս է շուրջ 17 %-ով։

56,3 %-ով նվազել է Վերակառուցման և զարգացման եվրոպական բանկի միջոցներով Հայաստանում կատարված շինարարությունը՝ կազմելով 820 մլն դրամ, 34,2 %-ով՝ Ասիական զարգացման բանկի միջոցներով կատարված շինարարությունը։

Համաշխարհային բանկի, Եվրոպական ներդրումային բանկի և Գերմանիայի զարգացման բանկի վարկերով Հայաստանում կատարված շինարարությունը նախորդ տարվա համեմատ աճ է գրանցել։

Ընդհանուր առմամբ՝ պետական միջոցների հաշվին երկրում կատարվող շինարարությունը նվազել է 4,6 %-ով՝ կազմելով 91 մլրդ 403 մլն դրամ։

Շինարարության ծավալը երկրում այս տարվա հունվար-հոկտեմբեր ամիսներին աճել է 16,4 %-ով։ Աճը հիմնականում եղել է համայնքային միջոցների (+59.9 %, 25 մլրդ 335 մլն դրամ), կազմակերպությունների (+31,2 %,227 մլրդ 107.3 մլն դրամ) և մարդասիրական օգնության (+17,6 %, 3 մլրդ 940.5 մլն դրամ) բյուջեով կատարված շինարարության հաշվին։

Անժելա Պողոսյան