2023 թվականի նոյեմբերի 30-ի դրությամբ Երևանի բյուջեի սեփական եկամուտների գծով փաստացի մուտքերը կազմել են 38 միլիարդ 314 միլիոն դրամ: Նոյեմբերի համար նախանշված ցուցանիշը գերակատարվել է 3 միլիարդ 574 միլիոն դրամով, կատարողականը կազմել է 110,2 տոկոս: 2022 թվականի նույն ժամանակահատվածի նկատմամբ 8 միլիարդ 373 միլիոն դրամով ավելի է հավաքագրվել:
Այս մասին նախօրեին Երևանի քաղաքապետարան գործակարգավարական խորհրդակցության ժամանակ զեկուցել է եկամուտների հաշվառման և գանձման վարչության պետ Արման Ջհանգիրյանը:
Երևանի քաղաքապետնն արձագանքել է, որ այս թվերը ևս մեկ առիթ են՝ անդրադառնալու Երևանի բյուջեին:
«Երևան քաղաքի բյուջեն իրապես թերհամալրված է և թերհամալրված է տասնամյակներով, և խոսքը միայն Երևան քաղաքի մասին չէ, այլ խոսքը ՀՀ-ի բոլոր քաղաքների մասին է, որոնք տասնամյակներով բյուջեի հետ կապված որոշակի խնդիրներ են ունեցել, և այս խնդիրները պետք է լուծվեն և պետք է լուծվեն ֆունդամենտալ կերպով»,- ասել է Ավինյանը:
Երևանի քաղաքապետը նաև տեղեկացրել է, որ առաջարկվող լուծումները կան, և որ պայմանավորվածություն է ձեռք բերվել ֆինանսների նախարարության հետ, որպեսզի փետրվարին ֆինանսական ապակենտրոնացման վերաբերյալ խորքային քննարկումներ արվեն:
«Այդ քննարկումները վստահաբար պետք է բերեն նրան, որ Երևան քաղաքը, և ոչ միայն Երևան քաղաքը, այլև ՀՀ բոլոր մնացած խոշորացված համայնքները պետք է ունենան միջոցներ, որպեսզի իրենց ենթակառուցվածքները կարողանան պահպանել, ոչ թե մաշեցնել: Եվ ես վստահ եմ, որ սա է այն ճանապարհը, որ ՀՀ բոլոր քաղաքներն ինտենսիվ կառուցապատման կանցնեն, և չենք տա տեղային լուծումներ, այլ կունենանք ինստիտուցիոնալ վերջնական համակարգ»,- ասել է նա:
