Այսօր բանկային աշխատողի օրն է․ որո՞նք են ֆինանսական ոլորտում ամենաբարձր աշխատավարձ ունեցող երկրները

30 տարի առաջ՝ 1993թ. նոյեմբերի 22-ին, Հայաստանում շրջանառության մեջ դրվեց ազգային արժույթը, ինչն առիթ հանդիսացավ հետագայում նշել այս օրը որպես բանկային համակարգի աշխատողի օր։

Ֆինանսական ոլորտը խիստ մրցակցային և եկամտաբեր ոլորտ է, որը գրավում է բազմաթիվ մասնագետների, ովքեր փնտրում են բարձր վարձատրվող աշխատանք՝ կարիերայի խոստումնալից աճով: Այնուամենայնիվ, ֆինանսների ոլորտում կարիերա կառուցելու համար էական է, թե որ երկրում ես բնակվում։

Banksnews.am-ը ներկայացնում է այն երկրների թոփ հնգյակը, որտեղ ֆինանսական ոլորտի աշխատողներն ամենաբարձրն են վարձատրվում։ Տվյալները վերցված են ischoolconnect.com կայքից։

1. Միացյալ Նահանգներ
   Միացյալ Նահանգները, անկասկած, ֆինանսների ոլորտում կարիերայի լավագույն երկրներից մեկն է, որտեղ Նյու Յորքը ծառայում է որպես համաշխարհային ֆինանսական կենտրոն: ԱՄՆ-ի ֆինանսական ոլորտը լայնածավալ և բազմազան է՝ ներդրումային բանկային գործունեության, մասնավոր կապիտալի, ակտիվների կառավարման, հեջային հիմնադրամների և վենչուրային կապիտալի հնարավորություններով: ԱՄՆ-ի լավագույն ֆինանսական ընկերությունների ցանկում են Goldman Sachs, J.P. Morgan, BlackRock և Morgan Stanley ընկերությունները:
   Այնուամենայնիվ, մրցակցությունը բարձր է, և աշխատանքային ու անձնական կյանքի հավասարակշռությունը կարող է դժվար լինել պահպանել՝ ունենալով երկար աշխատանքային ժամեր և աշխատելով բարձր ճնշման տակ:
   ԱՄՆ-ում ֆինանսների մասնագետների միջին աշխատավարձը կազմում է տարեկան մոտ $87,000, բայց, կախված գտնվելու վայրից և փորձից, կարող են զգալի տատանումներ լինել:
2. Միացյալ Թագավորություն
   ԵՎս մեկ առաջատար երկիր՝ ֆինանսների ոլորտում կարիերայի համար, որտեղ Լոնդոնը ֆինանսական կենտրոնն է: Մեծ Բրիտանիան ունի լավ կայացած ֆինանսական համակարգ, որը ներառում է ներդրումային բանկ, ապահովագրություն և ակտիվների կառավարում: Մեծ Բրիտանիայի խոշոր ֆինանսական ընկերությունները ներառում են HSBC-ն, Barclays-ը և Standard Chartered-ը:
   Մեծ Բրիտանիան առաջարկում է կարիերայի աճի հիանալի հնարավորություններ և մրցակցային աշխատավարձեր՝ ֆինանսական մասնագետների համար տարեկան մոտ 55,000 ֆունտ ստեռլինգ (շուրջ 69 հազար դոլար) միջին աշխատավարձով:
   Այնուամենայնիվ, Լոնդոնում ապրելու արժեքը բարձր է, և մրցակցությունը կարող է լինել շատ բարձր, քանի որ այստեղ ոլորտում կան բարձր որակավորում ունեցող շատ  մասնագետներ, ովքեր հավակնում են բարձր պաշտոնների:
3. Հոնկոնգ
   Զարգացող ֆինանսական արդյունաբերությամբ Հոնկոնգն առաջատար ֆինանսական կենտրոն է Ասիայում. ներառում է ներդրումային բանկային գործունեությունը, մասնավոր բանկինգը և ակտիվների կառավարումը: Քաղաքում են գտնվում աշխարհի մի քանի լավագույն ֆինանսական ընկերություններ, ինչպիսիք են HSBC-ն, Citigroup-ը և BlackRock-ը:
   Հոնկոնգն առաջարկում է կարիերայի աճի հիանալի հնարավորություններ, և աշխատավարձերը մրցունակ են, իսկ միջին աշխատավարձը կազմում է տարեկան 616,000 HKD (շուրջ 79 հազար դոլլար) ֆինանսական ոլորտի առաջատար մասնագետների համար:
   Այնուամենայնիվ, Հոնկոնգում ապրելու արժեքը նույնպես բարձր է, մրցակցությունը ինտենսիվ է, և ամբողջ աշխարհից շատ մասնագետներ աշխատանք են փնտրում այստեղ:

1. Սինգապուր
   Մեկ այլ առաջատար ֆինանսական կենտրոն՝ Ասիայում, որը գրավիչ ուղղություն է ֆինանսական ոլորտի մասնագետների համար:
   Սինգապուրի ֆինանսական արդյունաբերությունը ներառում է ներդրումային բանկինգ, մասնավոր բանկինգ, ակտիվների կառավարում և ապահովագրություն: Սինգապուրի առաջատար ֆինանսական ընկերություններն են DBS-ը, UOB-ը և OCB-ն:
   Սինգապուրն առաջարկում է կարիերայի աճի հիանալի հնարավորություններ՝ բարձր կենսամակարդակով և մրցունակ աշխատավարձերով: Այստեղ ֆինանսական ոլորտի մասնագետների միջին աշխատավարձը կազմում է տարեկան շուրջ 93,000 SGD (69 հազար դոլար):
   Այնուամենայնիվ, Սինգապուրում ապրելու արժեքը բարձր է՝ հարկերի բարձր դրույքաչափերով և բնակարանների բարձր գներով պայմանավորված:
2. Շվեյցարիա
   Շվեյցարիան լավագույն ուղղությունն է ֆինանսական համակարգի մասնագետների համար, ովքեր ձգտում են բարձր կենսամակարդակի, և՛ աշխատանքի և անձնական կյանքի գերազանց հավասարակշռության:
   Շվեյցարիայի ֆինանսական ոլորտը ներառում է մասնավոր բանկինգ, ակտիվների կառավարում և ապահովագրություն: Երկրի լավագույն ֆինանսական ընկերություններն են UBS-ը, Credit Suisse-ը և Swiss Re-ն: Շվեյցարիան առաջարկում է մրցունակ աշխատավարձեր՝ ֆինանսական ոլորտի մասնագետների համար տարեկան մոտ 110,000 CHF (124 հազար դոլար) միջին աշխատավարձով: Այնուամենայնիվ, Շվեյցարիայում ապրելը նույնպես թանկ հաճույք է, և աշխատատեղերի համար մրցակցությունը կարող է բարձր լինել:

Այլ առաջատար երկրներ

Ֆինանսական ոլորտում կարիերայի մյուս առաջատար երկրներն են Կանադան, Ավստրալիան և Գերմանիան: Այս երկրներն առաջարկում են կարիերայի աճի գերազանց հնարավորություններ և մրցունակ աշխատավարձեր, սակայն կյանքի արժեքը կարող է զգալիորեն տարբերվել՝ կախված գտնվելու վայրից:

• Հայաստանում այս տարվա սեպտեմբերին ֆինանսական և ապահովագրական ոլորտում միջին ամսական անվանական աշխատավարձը կազմում է 576 հազար 670 դրամ։ Այսինքն՝ տարեկան միջին աշխատավարձը կկազմի շուրջ 7 մլն դրամ (շուրջ 17 հազար 400 դոլար)։ Այս մասին Banksnews.am-ը տեղեկանում է ՀՀ վիճակագրական կոմիտեի հրապարակած տվյալներից։

Հատկանշական է, որ Հայաստանում ֆինանսական ոլորտում կանանց միջին աշխատավարձը կազմում է շուրջ 403 հազար դրամ, տղամարդկանցը՝ 838 հազար 600 դրամ։ Այս ոլորտում աշխատավարձը սեպտեմբերին նախորդ տարվա սեպտեմբների համեմատ աճել է 12 %-ով։

Ֆինանսների ու ապահովագրության ոլորտը Հայաստանում ամենաբարձր վարձատրվողներից 2-րդն է։ Այն զիջում է միայն տեղեկատվության ու կապի ոլորտին։

Հայաստանում սեպտեմբեր ամսվա տվյալներով 22 հազար 368 մարդ աշխատում է ֆինանսական և ապահովագրական ոլորտում՝ նրանցից 880-ը՝ պետական հատվածում։ Ֆինանսական և ապահովագրական ոլորտում աշխատողների շրջանում գերակշռում են տղամարդիկ, որոնց թիվը կազմում է 13 450:

Անժելա Պողոսյան