2024 թվականին ՀՀ աշխատանքի և սոցիալական հարցերի նախարարության բյուջեով նախատեսված է շուրջ 4 միլիարդ դրամ հատկացնել ԼՂ-ից բռնի տեղահանված անձանց բնակարանային ապահովման ծրագրի համար: Այս մասին Ազգային ժողովում ԱՍՀՆ-ի՝ 2024 թվականի բյուջետային հատկացումները ներկայացնելու ժամանակ ասել է նախարար Նարեկ Մկրտչյանը:
«2 միլիարդ դրամի պետական աջակցություն կտրամադրվի՝ շարունակելու ԼՂ-ի առանձին շրջաններից տեղահանված 4032 ընտանիքի բնակելի անշարժ գույք ձեռք բերելու կամ անհատական բնակելի տուն կառուցելու ծրագիրը: Այսօրվա դրությամբ ծրագրի շրջանակում բնակարանով ապահովվել է 1735 ընտանիք»,- ասել է նախարարը:
Նա տեղեկացրել է, որ սերտիֆիկատ ունեցողների մասով գործընթացը շարունակվում է: Ինչ վերաբերում է սահմանամերձ բնակավայրերում անհատական բնակելի տուն կառուցելու ծրագրին, ապա այդ նպատակով հիփոթեքային վարկ ստացած 500 շահառուի կտրամադրվի աջակցություն շուրջ 475 միլիոն դրամի շրջանակում: Նարեկ Մկրտչյանը նաև նշել է, որ այս ծրագրով արդեն իսկ շահառու է դարձել 180 ընտանիք:
Բաժանորդագրվեք մեր ալիքին Telegram-ում
