Նախարար Վահան Քերոբյանը հոկտեմբերի 26-ին Լոնդոնում մասնակցել է հայ-բրիտանական գործարար համաժողովին։
Համաժողովի ընթացքում քննարկվել են տնտեսության ոլորտի ընդհանուր խնդիրներին, գործարար միջավայրին, ինչպես նաև էներգետիկ, ենթակառուցվածքային, լոգիստիկ և տեխնոլոգիական հնարավորություններին վերաբերող հարցեր:
Նախարարն իր խոսքում նշել է, որ Հայաստանն ակտիվորեն բարելավում է իր առևտրային կապերը մի շարք երկրների հետ՝ նպատակ ունենալով դիվերսիֆիկացնել առևտուրը դեպի Մերձավոր Արևելք, Եվրոպա, Ասիա և Ամերիկա։
«Մենք հավատարիմ ենք առևտրի և ներդրումների համար բարենպաստ միջավայրի ստեղծմանը, խոչընդոտների վերացմանը և համագործակցության խթանմանը։ ՀՀ տնտեսությունը վերջին երեք տարվա ընթացքում կրկնապատկվել է, ինչի արդյունքում 2023 թ. մեկ շնչին բաժին ընկնող ՀՆԱ-ն կազմել է 8 հազար դոլար»,– ասել է նա։
Համաժողովը կազմակերպվել էր «Էնթերփրայզ Արմենիայի» կողմից, Մեծ Բրիտանիայում ՀՀ դեսպանության և ՀՀ-ում Մեծ Բրիտանիայի դեսպանության հետ համագործակցությամբ։
