Հանրային ծառայողները բնակարան ձեռք բերելու հնարավորություն կունենան Մալաթիա-Սեբաստիա վարչական շրջանում կառուցվող բազմաբնակարան շենքային համալիրից՝ նոր մեկնարկող հանրային ծառայողներին բնակարաններով ապահովման ծրագրի շրջանակում: Այս մասին հայտնում են Քաղաքաշինության կոմիտեից:
Կառավարությունը հոկտեմբերի 19-ի նիստում հաստատել է Քաղաքաշինության կոմիտեի մշակած որոշման նախագիծը, որով սահմանվում է Առնո Բաբաջանյան փողոցի 42/5 հասցեում «ՄԼ մայնինգ» սահմանափակ պատասխանատվությամբ ընկերության կողմից կառուցվող համալիրից բնակարանների և ավտոկայանատեղիների վաճառքի կարգը:
Ծրագրի շրջանակում հանրային ծառայողների համար «Նոր Երևան» թաղամասում առանձնացվել են ընդհանուր 1000 բնակարան և 700 ավտոկայանատեղի, որոնք բաշխվելու են 2 փուլով: Առաջին փուլով նախատեսվում է բաշխել 700 բնակարան և 490 ավտոկայանատեղի, իսկ երկրորդ փուլով՝ 300 բնակարան և 210 ավտոկայանատեղի:
Քաղաքաշինական ներդրումային ծրագիրն իրականացվում է՝ հաշվի առնելով բնակարանային շինարարությունը խթանելու պետության հանձնառությունը, հանրային ծառայողների շրջանում լայն արձագանքը, ինչպես նաև եկամտային հարկի վերադարձման արտոնության պարագայում առաջնային շուկայից բնակարան ձեռք բերելու հետաքրքրության աճը:
Տեղեկացնենք, որ առաջիկայում Քաղաքաշինության կոմիտեի կայքում www.minurban.am և ֆեյսբուքյան էջում կհրապարակվի ծրագրին մասնակցելու և հայտեր ներկայացնելու ժամկետների վերաբերյալ լրացուցիչ տեղեկատվություն: Մեկնարկած գործընթացի վերաբերյալ տեղեկատվությունն ուղարկվելու է բոլոր գերատեսչություններին՝ ծրագրից օգտվել ցանկացող իրենց աշխատակիցների վերաբերյալ ամփոփ տեղեկանք կազմելու նպատակով:
Բաժանորդագրվեք մեր ալիքին Telegram-ում
