ԲՏԱ նախարարը «Սիներջի Ինթերնեյշնլ Սիսթեմզի» հետ քնարկել է ԼՂ-ից բռնի տեղահանվածներին աշխատանքի տեղավորելու հարցը
ՀՀ բարձր տեխնոլոգիական արդյունաբերության նախարար Ռոբերտ Խաչատրյանը հոկտեմբերի 12-ին այցելել է «Սիներջի Ինթերնեյշնլ Սիսթեմզ» ընկերության հայաստանյան մասնաճյուղ: Այս մասին հայտնում են ԲՏԱ նախարարությունից:
Ռոբերտ Խաչատրյանը հիմնադիր նախագահ Աշոտ Հովհաննիսյանի ուղեկցությամբ շրջայց է կատարել ընկերության մասնաշենքում, զրուցել աշխատակիցների հետ, ծանոթացել ենթակառուցվածքներին և իրականացվող աշխատանքներին:
Շրջայցից հետո տեղի է ունեցել աշխատանքային քննարկում, որի ընթացքում նախարարին են ներկայացվել իրականացվող նախագծերը և գործունեության ընդհանուր աշխարհագրությունը։
Նախարարը բարձր է գնահատել ընկերության գործունեությունը՝ նշելով, որ տպավորված է «Սիներջի Ինթերնեյշնլ Սիսթեմզի» ենթակառուցվածքներով:
Հանդիպման ընթացքում քննարկվել են պետություն-մասնավոր հատված համագործակցության ամրապնդմանն ուղղված մի շարք նախագծեր և գաղափարներ, որոնց իրականացումը կնպաստի գիտելիքահեն տնտեսության զարգացմանը։
Անդրադարձ է կատարվել նաև Լեռնային Ղարաբաղից բռնի տեղահանված հայրենակիցների աշխատանքի տեղավորմանը և առաջնային այլ խնդիրների լուծմանն առնչվող հարցերին:
«Սիներջի Ինթերնեյշնլ Սիսթեմզ» ընկերությունը գործում է 26 տարի: Այն գրասենյակներ ունի Հայաստանում, ԱՄՆ-ում, Նիդերլանդներում, Ռուանդայում և Ուկրաինայում: Գլխամասային գրասենյակը Վաշինգտոնում է, իսկ ամենամեծ գրասենյակը՝ Երևանում:
Գործունեության ընթացքում ընկերությունն իրականացրել է ավելի քան 300 նախագիծ, այդ թվում՝ էլեկտրոնային կառավարման համակարգերի ստեղծումը, որոնք ներդրվել են աշխարհի տասնյակ երկրների պետական կառավարման մարմիններում:
Բաժանորդագրվեք մեր ալիքին Telegram-ում
