Ինչպիսի՞ն է ՀՀ կազմակերպությունների վարկային ծանրաբեռնվածությունը

Հայաստանի տնտեսության ներկայիս առանձնահատկություններից մեկն այն է, որ տնտեսությունը զգալիորեն կախված է վարկերից։ Վարկեր վերցնում են թե՛ տնային տնտեսությունները, թե՛ բիզնես շրջանակները։

ԿԲ-ի կողմից հրապարակված նոր տվյալների համաձայն՝ 2023թ-ի օգոստոսի վերջին կազմակերպություններին տրված վարկերի ծավալները կազմել են 2,1 տրլն դրամ։

Վերջինս 2023թ-ի օգոստոսին 2022թ-ի օգոստոսի համեմատ աճել է 12%-ով, իսկ նախորդ ամսվա համեմատ՝ 0,3%-ով։

Տնային տնտեսություններից ներգրավված ավանդների ծավալներն աճել են. Որքան են կազմում արտարժույթով և դրամով տրամադրված վարկերի ծավալները

Ուսումնասիրենք վարկերի վերոնշյալ ծավալների բաշխվածությունը` ըստ կազմակերպությունների չափերի․

Հաշվարկները ցույց են տալիս, որ խոշոր կազմակերպություններին բաժին է ընկնում վարկերի ծավալների 36%-ը։

Մյուս կողմից, ՓՄՁ-ին պատկանում է վարկերի ծավալների 64%-ը կամ 1,3 տրլն դրամ։

Միջին կազմակերպությունների մասնաբաժինը կազմակերպություններին տրված ընդհանուր վարկերի ծավալներում կազմել է 16%, փոքր և գերփոքր կազմակերպություններինը՝ համապատասխանաբար 20% և 28%։ Նկատենք, որ ՓՄՁ-ներին տրված վարկերի 47%-ը դրամային, իսկ 53%-ը՝ արտարժույթային վարկերն են։

ՓՄՁ-ներին տրված վարկերի ծավալները, ըստ ոլորտների, բաշխված են հետևյալ կերպ․

2023թ-ի օգոստոսի վերջի դրությամբ ՓՄՁ-ներին տրամադրված վարկերի ծավալների 25%-ը պատկանում է  առևտրի, 19%-ը՝ շինարարության և 12%-ը մշակող արդյունաբերության ոլորտներում գործունեություն ծավալող կազմակերպություններին։

Եվ վերջում անդրադառնանք  ՓՄՁ-ներին տրամադրված վարկերի ծավալների բաշխվածությանը`  ըստ ժամկետայնության․

Պարզվում է՝ 2023թ-ի օգոստոսի վերջին տրամադրված վարկերի ծավալների 53%-ի ժամկետայնությունը կազմում է 5 տարի և ավելի, 43%-ինը՝ 1-5 տարի, և 4%-ինը՝ մինչև 1 տարի։