Այս ուսումնական տարին թեև որոշ դասարանների աշակերտների համար սկսեց առանց դասագրքերի, այնուամենայնիվ, այդ նույն դասարանների աշակերտները գրքերը կկարողանան գնել ավելի մատչելի, քան նախորդ տարիներին։ Այս մասին Banksnews.am-ը տեղեկանում է ԿԳՄՍ նախարարության կայքում ներկայացրած տվյալների վերլուծությունից։
ԿԳՄՍ նախարարը հաստատել է 2023-2024 ուսումնական տարում դասագրքերի վարձավճարների չափը: Ըստ այդմ, դպրոցների 1-4-րդ դասարանների սովորողների դասագրքերը տրամադրվում են անվճար՝ համաձայն «Կրթության մասին» ՀՀ օրենքի 6-րդ հոդվածի 4-րդ մասի։ Դրանց արժեքը հատուցվում է պետական բյուջեի միջոցների հաշվին: Ազգային փոքրամասնությունների սովորողների դասագրքերը և բրալյան տառատեսակով տպագրվող դասագրքերը ևս տրամադրվում են անվճար:
![](https://banksnews.am/wp-content/uploads/2024/05/converse-970x250-c360.webp)
Այս ուսումնական տարում նոր չափորոշիչներով տպագրված նոր դասագրքերը կունենան հետևյալ արժեքները․
- Գրականություն – 270 դրամ նախորդ տարվա 440-ի փոխարեն
- Անգլերեն – 270 դրամ նախորդ տարվա 480-ի փոխարեն
- Ֆիզիկա – 260 դրամ նախորդ տարվա 440-ի փոխարեն
- Աշխարահագրություն – 270 դրամ նախորդ տարվա 350-ի փոխարեն
- Երաժշտություն – 180 դրամ նախորդ տարվա 350-ի փոխարեն
- Հայոց լեզու – 340 դրամ նախորդ տարվա 440-ի փոխարեն
- Հանրահաշիվ – 300 դրամ նախորդ տարվա 440-ի փոխարեն
- Երկրաչափություն – 310 դրամ նախորդ տարվա 440-ի փոխարեն
- Հայոց պատմություն – 280 դրամ նախորդ տարվա 400-ի փոխարեն
- Համաշխարհային պատմություն – 320 դրամ նախորդ տարվա 390-ի փոխարեն
- Հասարակագիտություն – 240 դրամ (Նախորդ տարի այս առարկան չի եղել 7-րդ դասարանում)
- Քիմիա – 320 դրամ նախորդ տարվա 330-ի փոխարեն
- Կենսաբանություն – 330 դրամ նախորդ տարվա 400-ի փոխարեն
Այսպիսով՝ ընդհանուր առմամբ այս տարվա 7-րդ դասարանի դասագրքերի գումարը կազմում է շուրջ 3700 դրամ՝ նախորդ տարվա 5530-ի փոխարեն։ Նշենք, որ նախորդ տարվա առարկաներից այս տարի 7-րդ դասարաններում չեն անցնում Ինֆորմատիկա և Հայոց Եկեղեցու պատմություն առարակաները։
Իսկ 5-րդ դասարանի նոր գրքերն այս տարի արժեն․
- Մայրենի-270 նախորդ տարվա 400-ի փոխարեն
- Մաթեմատիկա- 260 դրամ նախորդ տարվա 400-ի փոխարեն
- Ֆիզկուլտուրա – 260 դրամ
- Թվային գրագիտություն և համակարգչային գրագիտություն – 220 դրամ
- Գերմաներեն – 310 դրամ նախորդ տարվա 440-ի փոխարեն
- Անգլերեն – 350 դրամ նախորդ տարվա 440-ի փոխարեն
- Տեխնոլոգիա – 240 դրամ նախորդ տարվա 280-ի փոխարեն
- Բնություն – 280 դրամ
- Երաժշտություն -190 դրամ նախորդ տարվա 470-ի փոխարեն
Ընդհանուր առմամբ՝ 5-րդ դասարանի դասագրքերն այս տարի արժեցել են 2380 դրամ նախորդ տարվա 4340 դրամի փոխարեն։ Նշենք, որ նախորդ տարվա առարկայացաբկում նշված որոշ առարկաների դասագրքեր այս տարվա ցուցակում չկան։
Տարեսկզբին պարզ դարձավ, որ 2-րդ, 5-րդ և 7-րդ դասարանների աշակերտների դասագրքերը կուշանան։ ԿԳՄՍ նախարարությունից Banksnews.am-ին հայտնեցին, որ 5-րդ և 7-րդ դասարանների դասագրքերը տպագրված են։
«Խոսքն այն գրքերի մասին է, որոնք նոր չափորոշչի շրջանակում ստեղծված են: Դասագքրերի մեծ մասն արդեն դպրոցներին առաքվել է, մանացածն էլ առաքման փուլում է: 2-րդ դասարանի դասագրքերը զուգահեռաբար տպագրվում և բաշխվում են՝ դպրոցներ կան, որ արդեն ստացել են, բաշխման գործընթացն ընթացքի մեջ է»,- տեղեկացրին նախարարությունից:
Բաժանորդագրվեք մեր ալիքին Telegram-ում