![](https://banksnews.am/wp-content/uploads/2024/05/converse-970x250-c360.webp)
Արցախ Լեմկինի անվան ցեղասպանության կանխարգելման ինստիտուտը երկրորդ SOS ահազանգն է հնչեցնում արցախահայության համար, ովքեր այս պահին գտնվում են ցեղասպանության կրիտիկական վտանգի տակ։
Սեպտեմբերի 20-ին և 21-ին Ադրբեջանի կողմից իրականացված մի շարք ավիահարվածներից, անօդաչու թռչող սարքերի հարձակումներից և քաղաքացիական բնակեցված տարածքների զանգվածային գնդակոծումից հետո Արցախի սարսափած բնակիչները հայտնվել են ադրբեջանական զինուժի պատանդի կարգավիճակում՝ առանց ելքի ուղիների,-նշվում է հաղորդագրության մեջ։
…Այս պահին տեղում վիճակն անորոշ է։ Ադրբեջանը դադարեցրել է Արցախում էլեկտրաէներգիայի, բնական գազի և հեռահաղորդակցության բոլոր մատակարարումը (հեռախոս, ինտերնետ): Չհաստատված տեղեկություններ կան վայրագությունների և ջարդերի մասին:
Կառույցը նշել է նաև, որ 2023 թվականի սեպտեմբերի 21-ին ՄԱԿ-ի Անվտանգության խորհրդի կողմից ոչ մի քայլ չի ձեռնարկվել շարունակվող, անընդհատ փոփոխվող ճգնաժամը լուծելու համար:
Լեմկինի Ցեղասպանության կանխարգելման ինստիտուտը միջազգային հանրությանը կոչ է անում անհապաղ գործել՝ օգնելու ապահովել Արցախի ժողովրդի անվտանգությունը, ինչպես քաղաքացիական, այնպես էլ Արցախի պաշտպանության բանակի զինաթափված անդամների, ովքեր հանցագործություն չեն կատարել և պետք է անարգել դուրս բերվեն։
Գրառման մեջ անդրադարձ է արվել Ադրբեջանի նախագահ Իլհամ Ալիևի այն հայտարարությանը, թե «միայն» թիրախավորում է Արցախի Հանրապետության դեմոկրատական իշխանության «հանցավոր խունտան»: Մինչդեռ, ըստ կառույցի, Արցախի իշխանությունը ընտրված մարմին է, որը ոչ մի հանցանք չի գործել։
Ադրբեջանը պնդում է նաև, որ Արցախի պաշտպանության բանակի զինվորները և Արցախի բնակչությունը (հաճախ տարածվում է ամբողջ աշխարհի հայ բնակչության վրա), «ահաբեկիչներ» և «ապօրինի անջատողականներ» են։ Այս պնդումները կեղծ են և հերքված են Լեռնային Ղարաբաղի տարածաշրջանի պատմությամբ։ Մեծ է հավանականությունը, որ Արցախի ժողովրդավարական ճանապարհով ընտրված կառավարության և Արցախի պաշտպանության բանակի ցանկացած նախկին անդամ, ով կհայտնվի Ադրբեջանի ձեռքում, կարժանանա դաժան բռնությունների, խոշտանգումների և կսպանվի։
Ադրբեջանը վայրագություններ է իրականացրել գրեթե բոլոր հայ խաղաղ բնակիչների և ռազմագերիների նկատմամբ, որոնց գերի է վերցրել 2016, 2020 և 2022 թվականների պատերազմներում: Ոչ մի հիմք չկա, որ այդ ուժերը այլ կերպ վարվեն 2023 թվականին….
…Լեմկինի ինստիտուտը սարսափած է այն ամենից, ինչ աշխարհը թույլ է տվել, որ տեղի ունենա արցախահայության հետ՝ չնայած ցեղասպանությունների կանխարգելման գրեթե բոլոր փորձագետների և հասարակական կազմակերպությունների կողմից տարիներ շարունակ նախազգուշացումներին, որոնք կանխագուշակել էին միջազգային հանրության դիտավորյալ կուրության պայմաններում տեղի ունեցող աղետը:
Մենք հանձնառու ենք ոչ միայն ականատես լինել Արցախում ներկայումս տեղի ունեցող զանգվածային վայրագություններին, որոնց մեղսակից են բազմաթիվ համաշխարհային առաջնորդներ և հզոր շահագրգիռ կողմեր, այլ նաև Արցախի բնակչության համար ապահովել արդարադատություն Հարավային Կովկասում տեղի ունեցող զանգվածային վայրագություններից։
Բաժանորդագրվեք մեր ալիքին Telegram-ում